Гиёҳвандлик ва қимор ўйинлари эркин савдоси тарқалгани учун Туркия «Telegram»ни блокламоқчи.Бу ҳақда Туркиянинг «Sabah» газетаси хабар берди.
Хабарда айтилишича, Туркияда ахборот алмашиш учун кенг тарқалган илова «Тelegram» меcсeнжерида очилган каналлар орқали гиёҳвандлик моддалар, фоҳишалик, қимор ўйинлари ва педофилия ҳақидаги видеолар эркин савдо қилинаётгани маълум бўлган.
Туркияда «Telegram»нинг штаб-квартираси бўлмаганлиги учун Ахборот технологиялари ва коммуникация бошқармаси (БТК) месанжернинг Англиядаги штаб-квартирасига шу каби ахборот тарқатаётган каналларни ёпиш учун мингдан ортиқ хабарнома юборган бўлса ҳам штаб-квартира буларнинг ҳеч бирига жавоб қайтармаган.
«Агар «Telegram» қисқа вақт ичида ушбу каналларга нисбатан эҳтиёт чораларини кўрмаса, «Telegram»ни ёпиш кун тартибига қўйилиши мумкинлиги таъкидланди», — дейилади хабарда.
Маълумот учун, Туркия «Telegram» месceнжеридан энг кўп фойдаланадиган давлатлар орасида 10-ўринда туради. Туркияда 8 миллиондан ортиқ фуқаро «Telegram» дан фойдаланади.
Эслатиб ўтамиз, Туркияда 9 кун олдин «Instagram» ижтимоий тармоғи ҳам блокланган эди. Ахборот технологиялари ва коммуникация бошқармаси «Meta» компанияси билан келишувга эришиб ижтимоий тармоқда Туркияда террорчи деб эълон қилинган бир қанча ташкилотларнинг рекламалари ва видеолари эълон қилмасликка эришган.
Турли ҳисоб-китобларга кўра, Ўзбекистонда «Telegram» дан 18 миллиондан 24 миллионгача бўлган фойдаланувчиси бор.