Ўзбекистон президенти ҳали Қозоғистонга қилган ташрифини якунламаган бир вақтда, Тошкент кўчаларида Япония бош вазири ташрифига тайёргарлик бошланиб кетган. Япония бош вазири Фумио Кисида 9-12 август кунлари Ўзбекистон, Қозоғистон ва Мўғулистонга ташриф буюриши кутилмоқда. Шу вақтда Россия ТИВ расмийси Мария Захарова Фумио Кисиданинг Марказий Осиёга қилажак ташрифларидан хавотирда эканлигини билдирди.
Россия Ташқи ишлар вазирлиги расмий вакили Мария Захарова Япония бош вазири Фумио Кисиданинг Марказий Осиё давлатларига бошланажак ташрифини қоралади. Фумио Кисида 9-12 август кунлари Ўзбекистон, Қозоғистон ва Мўғулистон давлати раҳбарлари билан яккама-якка учрашувлар ўтказади. Ташриф чоғида бош вазирга элликдан ортиқ инвестор, тадбиркорлар ҳамроҳлик қилиши айтилган.
Шунингдек, Япония бош вазири Марказий Осиёни Каспий транспорт йўлаги билан боғлаш чораларини муҳокама қилиши ҳам айтилган.
Мария Захарованинг расмий баёнотида бош вазирнинг ташрифи ортида иқтисодий манфаатлар эмас, АҚШнинг қистови тургани айтилади. Захарова айтишича, Япония Россиянинг йиллар давомида минтақада шаклланган иқтисодий муносабатларини бузишга уринмоқда. Унга кўра, Япония Марказий Осиё давлатлари Ғарбнинг “Россия ва Хитойга қарши” бўлган ғояларига “оғдирмоқчи”.