Ўзбекистон, Қозоғистон ва Озарбайжонда Марказий Осиё давлатларидан Европага яшил энергияни экспорт лойиҳасини амалга ошириш учун Бокуда қўшма корхона ташкил этилади. Бу ҳақда Остонадаги Марказий Осиё давлатлари энергетика вазирларининг биринчи йиғилишида Озарбайжон энергетика вазири ўринбосари Орхан Зейналов маълум қилган.
«Озарбайжон, Қозоғистон ва Ўзбекистон энергетика тизимларини Марказий Осиёдан Озарбайжон орқали Европага экспорт қилиш бўйича лойиҳани амалга ошириш доирасида яхши динамика ва тараққиёт кузатилмоқда.Томонлар ўртасида лойиҳани амалга оширишнинг дастлабки техник-иқтисодий асослари келишиб олинди, қўшма ишчи гуруҳ Бокуда миллий энергетика компаниялари иштирокида қўшма корхона ташкил этиш бўйича келишувга эришди», — деган Озарбайжон энергетика вазир ўринбосари Орхан Зейналов.
Вазир ўринбосарининг сўзларига кўра, томонлар яшил энергияни ривожлантириш ва узатиш соҳасида стратегик шериклик тўғрисидаги битим лойиҳаси матнини ҳам келишиб олган.
«Озарбайжон ҳудудидан ўтувчи ушбу ва бошқа экспорт йўлаклари яшил энергияни Марказий Осиё давлатларидан Европага ўтказиш учун кенг истиқболларни очади», – деган Озарбайжон Энергетика вазирлиги раҳбари ўринбосари.
Зейналовнинг айтишича, ноябрь ойида Бокуда бўлиб ўтадиган БМТнинг COP29 иқлим конференцияси доирасида яшил энергияга ўтишни ривожлантириш бўйича бир қатор юқори даражадаги тадбирлар режалаштирилган.
Хусусан, қайта тикланувчи энергия манбалари халқаро агентлиги (IRENA) билан биргаликда давлат раҳбарлари даражасида Марказий Осиё – Озарбайжон энергетика инвестиция форумини ўтказиш режалаштирилган.
Маълумот учун, Ўзбекистонда 2021 йилдан бошлаб бугунги кунга қадар 10 та «яшил» электр станция – 9 та қуёш ва 1 та шамол электр станцияси (жами қуввати 2 минг 500 мегаваттдан ортиқ) ишга туширилган.
Бугунги кунда ишлаб чиқариладиган электр энергиясининг 25-30 фоизгача қисми яшил энергия ҳиссасига тўғри келмоқда.