Япония Россияга қарши санкцияларни четлаб ўтган Хитой, Ҳиндистон, БАА ва Ўзбекистон компанияларига нисбатан санкцияларни қўллаши мумкин. Бу ҳақда Япония ҳукумати бош котиби Ёсимаса Хаяши Токиодаги матбуот анжуманида маълум қилган.
“Санкцияларга келсак, мамлакатимиз Россияга қарши санкциялардан қочиш ёки четлаб ўтишга уринишларга қатъий муносабатда бўлишни муҳим деб ҳисоблайди, биз Хитой ва Ҳиндистон, БАА, Ўзбекистон, Қозоғистон компанияларига қарши санкцияларни ўз ичига олган пакетни кўриб чиқаётганимизни маълум қилдик. Биз ҳозир Россияга қарши янги санкциялар пакети тафсилотларини келишишнинг якуний босқичидамиз ва тез орада расман эълон қилишни режалаштирмоқдамиз”,
деди Хаяши.
Маълумот учун, Россия-Украина уруши бошланганидан бери Япония “Катта еттилик“ гуруҳи билан келишилган ҳолда Россия давлат амалдорлари ва муассасалари, жумладан, президент Владимир Путинга нисбатан санкциялар жорий қила бошлаган эди.
Эслатиб ўтамиз, аввалроқ иқтисодчи Тўлқин Бобоқулов Uzdiplomat.uz’га интервью бериб, агар Ўзбекистон банклари Россия туфайли Ғарб санкцияларига тушса, мамлакат ташқи қарзини тўлай олмай дефолт ҳолатига тушиши мумкинлигини айтган эди.