Қозоғистоннинг Биринчи Президенти Нурсултон Назарбоев ўзининг “Менинг ҳаётим. Қарамликдан озодликка” номли мемуарлар китобини Ўзбекистон Президенти Шавкат Мирзиёевга совға қилди. Муаллиф дастхати туширилган, Ўзбекистон Президенти учун аталган нусхасини унинг матбуот котиби Айдос Укибай бугун, 6 декабрь куни Ўзбекистон Президентининг матбуот котиби Шерзод Асадовга берган.
Шунингдек, Айдос Укибай Назарбоевнинг саломи ва энг эзгу тилакларини етказган.
“Тарихий жараёнлар ва шахсий муносабатни ўзида мужассамлаштирган китобда Нурсултон Назарбоев ўзининг ҳаётий йўли, мамлакатнинг шаклланиш ва ривожланиш даври тўғрисидаги хотиралари билан ўртоқлашади. Республикага раҳбарлик қилган охирги ўн йилликлардаги воқеаларга баҳо беради»,
дейилган Асадов хабарида.
Қайд этилишича, китоб қаҳрамонлари орасида муаллиф сиёсий майдонда кесишган таниқли сиёсатчилар ҳам бор. Унда Қозоғистоннинг Биринчи Президенти давлат ва ҳукуматлар раҳбарлари, бошқа машҳур шахслар билан муносабатларини таърифлайди.
Бундан ташқари, Нурсултон Назарбоев ўз китобида Ўзбекистон етакчисини “атоқли сиёсий арбоб Шавкат Мирзиёев”
дея алоҳида қайд этган.
“Китобда давлатимиз раҳбари томонидан олиб борилаётган, мамлакатимиз иқтисодий салоҳиятини оширишга хизмат қилаётган ислоҳотлар юксак баҳоланган. Қозоғистон билан ҳар томонлама алоқалар янада жадал ривожлана бошлангани, Шавкат Мирзиёев Президент сифатидаги фаолиятининг илк кунлариданоқ қардош мамлакатлар билан ҳамкорликни мустаҳкамлаётгани мамнуният билан қайд этилди”,
деб ёзган Президент матбуот котиби.