Ўзбекистонда кадрлар муаммоси борми?
Ўзбекистонда кадрлар сиёсати қай аҳволда? Нега вазирлик икки ойлаб вазирсиз, аксарият вазирлар эса маслаҳатчи ва бир нечталаб ўринбосарларсиз ишламоқда?
Ўзбекистонда мавжуд 21 вазирликнинг расмий манбаларига таянилса, учта вазирликда «вазирнинг биринчи ўринбосари» ва «вазир ўринбосари» лавозимлари бўш турганлиги, бирида вазир маслаҳатчиси тайинланмагани, яна бирида эса вазирнинг ўзи йўқлиги маълум бўлади.
Жумладан, Камбағалликни қисқартириш ва бандлик вазири Беҳзод Мусаевга жами 3 та ўринбосар лозим бўлса, 2 тасига — «вазирнинг биринчи ўринбосари» ва «вазир ўринбосари» лавозимларига кадрлар тайинланмаган. Яъни вазир битта ўринбосар билан ишламоқда.
Шунингдек, Экология, атроф-муҳитни муҳофаза қилиш ва иқлим ўзгариши вазири Азиз Абдуҳакимовнинг жами учта ўринбосари бўлиши кераклиги кўрсатилган, лекин битта ўринбосар лавозими «вакант» турибди.
Сув хўжалиги вазири Шавкат Ҳамроевнинг ҳам 4 та ўринбосари бўлиши лозим, бироқ у ҳам иккита ўринбосар билан ишламоқда. Яъни яна 2 та — «вазирнинг биринчи ўринбосари» ва «вазир ўринбосари» лавозимлари бўш.
Бундан ташқари, Қишлоқ хўжалиги вазири Иброҳим Абдураҳмоновнинг иқтисод, инновацион ривожланиш ва инвестициялар масалалари бўйича маслаҳатчиси тайинланмаган, Олий таълим, фан ва инновациялар вазирлиги эса икки ярим ойдан бери вазирсиз ишламоқда.