“Ёшлар Форуми 2023” доирасида жамиятнинг навқирон қатлами билан учрашган амалдорлар ёшларнинг имтиёзлар ҳақидаги турли таклифларини тинглади ва саволларига жавоб қайтарди. Uzdiplomat.uz нашри имтиёзлар билан боғлиқ эътирозли саволлар жавобини ёзиб олди.
Қишлоқ хўжалиги вазири Иброҳим Абдураҳмонов:
— Мен олдин Олий таълим вазири бўлганим учун кўпроқ биламан, имтиёзлар ривожланишга жуда катта тўсиқ. Биз ёшларнинг буни тўғри тушунишини хоҳлаймиз. Мен сизларнинг рақобатбардош, хоҳлаган пайти нонини топиб ейдиган, тишлаган жойини узиб оладиган, стипендиятлардан ғурурланган бўлардим. Олий таълим тизимида жами 53 та имтиёз бор. Ҳар йили айнан 53 та категорияга кўра ОТМларга киришда имтиёзлар берилади. Ижтимоий тармоқларда имтиёзлар ҳақида билдирилган эътирозлар ҳам бўлди.
Бунда рақобат муҳити йўқолиб қолган жойлар ҳам бор. Лекин бошида бу имтиёзлар таъсис этилганда мақсад яхшилик эди. Ёшларга имконият берайлик, деган мақсадда жорий этилганди улар. Бу имтиёзларнинг ортидан ҳам илмли ёшлар пайдо бўлди. Бошида, яъни 7-8 йил олдин бу имтиёзлар керак эди бизга. Аммо ҳозир бу имтиёзларнинг ҳаммасинига ўзаро рақобат қила оладиган, бир-бирига ўрнак бўладиган ёшларни тарбиялаш керак. Шу имтиёзни қилмайлик, ҳамма ҳалол рақобат қилсин.
Маданият вазири Озодбек Назарбеков:
— Хорижлик талабаларнинг контрактини тўлашга келсак, бир талабанинг ОТМда таҳсил олиши давлатга 32 миллионга тушади. Энди бегоналарга, бировнинг боласига ҳам пул тўламайлик. Бошқа давлатдан келса, марҳамат қилиб ўша эл қатори тўласинда ўқийверсин. Чунки шундоқ ҳам Кансерваторияда ўқитиш давлатга 45 миллионга тушади. Инсоф билан қарасак, шундоқ ҳам ҳар бир талаба ўқишининг 70% тўловини давлат ўз зиммасига олган. Энди бегонанинг ҳам ўқиш пулини тўлаб бериш ҳақида гапиришга юзим чидамайди. Бизда ўқиш пули усиз ҳам арзон. Масалан, сиз бирор бошқа давлатга бориб ўқишингиз учун 6 минг доллардан кам бўлмайди.
Ўзбекистон Республикаси Президенти ҳузуридаги Давлат хизматини ривожлантириш агентлиги директорининг биринчи ўринбосари Отабек Ҳасанов:
— Биз бир тизимдан иккинчи тизимга ўтяпмиз. Ҳақиқий иқтисодиёт, ҳақиқий инвестиция олиб кирилаётган пайтда баъзи бир қатламларни қўллаб-қувватлаш учун имтиёзлар керак эди. Лекин шу соҳани кузатиб юрган, унинг ичида юрган сиёсатчи сифатида шуни айта оламанки, 5-6 йилдан кейин кўп имтиёзлардан воз кечилади. Бу менинг шахсий фикрим.