Ўзбекистонлик сиёсатчи, “Миллий тикланиш” Демократик Партияси Марказий кенгаши раиси Алишер Қодиров ўзининг Х (Twitter) ижтимоий тармоғига Ғарб сиёсати танқид қилинган пост қолдирди.
“Улар инсон ҳуқуқлари ҳақида баландпарвоз гапириб, бегуноҳ одамларнинг ўлимидан фойда кўришади.
Ғарб сиёсати виждон инқирозини бошдан кечирмоқда!”
дея постига Европа Иттифоқининг ташқи сиёсат бўйича раҳбари Жосеп Боррелнинг Aл-Жазира араб каналига берган интервьюсидан парчани илова қилган Қодиров.
Гап шундаки, мазкур интервьюда Жосеп Боррель “Ҳамас”нинг 7 октабрь куни Исроилга қилган ҳужумини “уруш жинояти” деб атаган. Аммо Исроилнинг Ғазога қилган ҳужумлари ҳақида сўралганда, у “Мен адвокат эмасман” деб жавоб қайтарган. Унинг ушбу фикрлари дунё бўйлаб ижтимоий тармоқларда норозиликларга сабаб бўлди.
“-Ҳамас” террорчими?
-Ҳа, тинч аҳолини ўлдиришади.
-Исроил ҳам ўн минглаб тинч аҳолини ўлдиради.
- Мен адвокат эмасман”, – дея журналист ва Европа Иттифоқининг ташқи сиёсат бўйича раҳбари суҳбатидан иқтибос келтирган Қодиров.
Унинг мазкур постдаги фикрларини эса кўплаб кузатувчилар қўллаб-қувватламоқда.