Ўзбекистон орқали Россияга кетаётган Туркманистон фуқаролари “Тошҳовуз” назорат-ўтказиш пунктидан ҳеч қандай сабабларсиз орқага қайтарилмоқда. Бу ҳақда “Turkmen news” хабар берди.
Маълум бўлишича, Туркманистон фуқароларини туркман чегарачилари қандай виза бўлишидан қатъий назар мамлакат ҳудудидан чиқармасликка ҳаракат қилмоқда. Шунингдек назорат-ўтказиш пунктида Туркманистон фуқароларининг Россияга кетиш ёки кетмаслиги ҳам қаттиқ сўроқ қилинмоқда.
“Туркманистон фуқаролари пулни тежаш мақсадида Ўзбекистон авиақатновларидан фойдаланмоқда. 2024 йилнинг май ойи маълумотларига кўра, Россиянинг С7 компаниясининг Ашхобод-Москва йўналиши чиптаси нархи 577 доллар, Урганч–Москва йўналишидаги чипта нархи эса 119 доллар туради”,
дейилган “Turkmen news” хабарида.
Нашрнинг ёзишича, тасдиқланмаган хабарларга кўра Ашхабоддан Россияга тўғридан-тўғри учиш янада қийинлашган.
Баъзи манбалар Туркманистон расмийлари шу йўл билан меҳнат муҳожирлари оқимини тўхтатмоқчи, деган фикрда. Бошқалар эса бу чоралар туркман фуқароларини Украинадаги урушга жалб қилиш ҳолатлари кўпайиб бораётгани муносабати билан кўрилган, деб ҳисоблайди.
Шунингдек хабарда, сўнгги йилларда Туркманистондан Россия, Туркия ва бошқа мамлакатларга меҳнат миграцияси ва эмиграцияси барқарор ўсиб бораётганлиги келтирилган. Расмийлар эса бунга паспорт бериш, виза олиш, чипта сотиб олиш ва бошқа зарур ҳаракатларни бюрократик тарзда мураккаблаштириш орқали қарши курашишга ҳаракат қилаётгани айтилган.