Буни BMB Holding компанияси амалга оширади.
Жорий йилнинг 8-9 апрель кунлари Давлатимиз раҳбари Шавкат Мирзиёев ҳудудлар иқтисодиёти, муҳим ижтимоий дастурлар ижроси билан танишиш мақсадида Жиззах вилоятида амалий ташриф билан борган эди.
Мазкур ташриф доирасида Президентимиз BMB Holding компанияси тизимидаги корхоналар, хусусан, BMB-NRC Agrologistics қўшма корхонаси фаолияти билан ҳам яқиндан танишди.
Мазкур агрологистик мажмуанинг умумий қиймати 57,7 миллион АҚШ долларини ташкил этади. Лойиҳанинг биринчи босқичида 405 минг тонна саралаш, 4,8 минг тонна сақлаш, 200 минг тонна қадоқлаш қувватга эга 1-модул ишга туширилди. Лойиҳани ўзига хослиги шундаки, мажмуа “Ягона дарча” тамойили асосида божхона, банк шохобчаси, фитосанитар ва санитар-эпидемиологик сертификатлаштириш лабораторияларини ўзида жамлаган.
Шунингдек, комплексда фаолият кўрсатувчи лаборатория “Россельхознадзор” аккредитациясидан ўтган бўлиб, у тақдим этган сертификат қишлоқ хўжалиги маҳсулотларини Россия Федерациясига тўсиқларсиз экспорт қилиш имконини беради. Яъни экспортёр ўзининг маҳсулотини Ўзбекистоннинг ўзида (Агрологистик комплексда) лабораториядан ўтказиб мувофиқлик сертификатини олган ҳолда “Яшил йўлак” орқали ҳеч қандай қўшимча текширувларсиз Россия Федерацияси ҳудудига олиб кириши мумкин. Ушбу хизмат тури Марказий Осиёда ягона.
Бундан ташқари мажмуада декларант хизматлари,офислар, хостел ва ошхона хизматлари йўлга қўйилган. Энг асосийси, мазкур комплексда бугунги кунда 180 нафар маҳаллий аҳоли доимий иш билан таъминланди. Келажакда 1,5 – 2 минг нафар ишчи ўрни яратилиши режалаштирилган.