Аввалроқ Uzdiplomat.uz сайти Ўзбекистонлик “Меҳрибонлик уйи” битирувчиси Роберт Носировнинг Хитойга ўқишга кирганини билган Президент бутун жамоатчилик кўриб турган, катта йиғилишда талаба шартнома пулларини Тошкент вилоят ҳокимлиги зиммасига юклаган эди. Президент берган топшириғи Тошкент вилояти томонидан бажарилмагач, бу ҳақида сайтимизда мақола эълон қилинган эди.
Тошкент вилояти ҳокимлиги ахборот хизмати раддия сифатида қуйидагиларни маълум қилди.
“Носиров Роберт Албертович 2021 йил июнь ойида 14-сонли Меҳрибонлик уйини битирган ва шу йили Хитой Халқ Республикаси Чангша шаҳрида жойлашган “Changsha University Of Science and Technology” ўқув юртига ўқишга кирган. Таълими учун 2400 АҚШ доллари миқдоридаги шартнома пулини тўлашда амалий ёрдам бериш ҳақида Чирчиқ шаҳар ҳокимлигига аризаси келиб тушган”, – дейилган хабарда.
Шу аснода Робертнинг Хитойдаги ўқишининг биринчи йил тўлов-контракти тўлаб берилган. Аммо кейинги йиллар учун тўлов пули тўланмаган ва у ўқишдан ҳайдалган.
“Бундай ҳолатлар Ўзбекистон Республикаси Вазирлар Маҳкамасининг 2022-йил 7-июндаги 312-сонли Қарори билан тасдиқланган “Ёшлар дафтари”ни юритиш орқали ёшлар муаммоларини тизимли равишда ҳал этиш ва уларни ижтимоий қўллаб-қувватлаш тартиби тўғрисида”ги Низом талаблари асосида тартибга солинади.
Мазкур Низомнинг 7-боб 35-моддасида, Республикамиздаги профессионал таълим ташкилотларида таълим олаётган, шунингдек, Ўзбекистон Республикасида фаолият кўрсатаётган барча олий таълим ташкилотларида (давлат, нодавлат олий таълим ташкилотлари, Ўзбекистон Республикаси ҳудудидаги хорижий олий таълим ташкилотлари ва хорижий олий таълим ташкилотларининг филиалларида) бакалавриатнинг кундузги, сиртқи ва кечки шаклида, магистратуранинг кундузги йўналишида таълим олаётган ўқувчи-талабаларга тўлов-контракт асосида ўқиш бўйича йиллик харажатларининг бир қисми қоплаб берилиши белгиланган”, – дейилади раддияда.
Шулардан келиб чиқиб, Роберт Носиров 2023 йил Чирчиқ давлат педагогика университетининг филология факультетига давлат гранти асосида ўқишга қабул қилинган.
“Робертнинг шахсий ривожланиши, жамиятда ўз ўрнини топиши учун Ёшлар ишлари агентлиги унинг ҳолидан мунтазам хабар олиб келмоқда.
Жумладан, 2022-йили унга “Ёшлар дафтари” маблағлари ҳисобидан “Tashkent IT Park University”да касб ўрганиши ва ўқиши учун 2 миллион сўм тўлаб берилган. 2023-йили “Ёшлар дафтари” орқали бир марталик моддий ёрдам ажратилган”, – дейилади ҳокимлик баёнотида.