Ўзбекистоннинг Россиядаги элчиси ва Қозон шаҳридаги Бош консуллик ходимлари воқеа жойига етиб боришган.
Ўзбекистоннинг Россия Федерациясидаги Элчихонасининг тасдиқлашича, 2024 йил 8 апрель куни Самара вилоятида (Россия Федерацияси) Чимкент-Нижний Новгород йўналиши бўйлаб ҳаракатланаётган автобус йўлдан чиқиб кетиб, ағдарилиб кетган. Ҳодиса Самара вилоятидаги Урал-Муханово трассасида содир бўлган.
Ҳодиса вақтида автобусда 66 йўловчи бўлган. Оқибатда икки нафар Ўзбекистон фуқароси ҳалок бўлди, 20 га яқин киши жароҳат олди ва тиббиёт муассасаларига жойлаштирилган.
«Зарур ёрдам кўрсатиш мақсадида Ўзбекистоннинг Россиядаги элчиси ва Қозон шаҳридаги Бош консуллик ходимлари воқеа жойига етиб боришди», дейилади хабарда.
Ўзбекистон вакиллари Россия Федерациясининг Самара вилоятидаги тегишли ташкилотлар билан яқиндан ҳамкорлик қилмоқда. Вазият алоҳида назорат остида.
Элчихона ҳодисада ҳалок бўлган Ўзбекистон Республикаси фуқароларининг оила аъзолари ва яқинларига чуқур ҳамдардлик билдирган ва мурожаат учун алоқа рақамларини илова қилган.
Эслатиб ўтамиз, бу ой бошидан буён ўзбекистонлик муҳожирлар иштирокидаги трассада юз берган иккинчи бахтсиз ҳодисадир.
3 апрель куни Самара-Чимкент автомобиль йўлининг Маржонбулоқ қишлоғи яқинида юз берган автоҳалокат оқибатида микроавтобус ҳайдовчиси ва унинг 7 нафар ўзбекистонлик йўловчиси воқеа жойида ҳалок бўлганди.