Бугундан бошлаб «Ўзбекнефтгаз» Акциядорлик жамиятига қарашли барча нефть база омборларидан ЕВРО-5 ССДФ русумли дизель ёнилғиси бир тоннаси 11 608 190 сўмдан арзонлаштирилган нархларда биржа савдоларига жойлаштирилди.
«Ўзбекнефтгаз» ахборот хизматининг хабарига қараганда, жамият томонидан қишлоқ хўжалиги маҳсулотлари етиштирувчиларни иқтисодий ва молиявий қўллаб-қувватлаш мақсадида Бухоро заводида синтетик дизель ёнилғиси компонентини компаундлаш орқали ишлаб чиқарилган дизель ёнилғисининг нархлари ЭКО дизель ёнилғиси нархига нисбатан 15 фоизга арзонлаштирилган.
Аввалроқ, «Ўзбекнефтгаз» раҳбари Баҳодиржон Сидиқов фермерларга мурожаат қилиб, бир ҳафта ичида «Ўзбекнефтгаз» томонидан биржа савдоларига қўйилаётган дизель нархини 15% га тушириш чоралари кўрилишини билдирганди.
Қайд этиш лозимки, ушбу чоранинг автомобилларга ёқилғи қуйиш шохобчаларидаги нархларга алоқаси йўқ. Ахборот хизмати вакили Uzdiplomat сўровига жавобан бензин нархларининг туширилишига қаратилган режа ҳозирча назарда тутилмаётганлигини билдирди.
Эслатиб ўтамиз, аввалроқ, Энергетика вазирлиги автомобилларга газ тўлдириш компрессор шохобчалари фаолиятига қисқа муддатли чекловлар киритилаётганини маълум қилди. Бу чекловларнинг аниқ муддатлари хабарда кўрсатилмаган.