Ўзбекистонда 2023 йилнинг ўзида 331 та ихтиро давлат рўйхатидан ўтказилган. Бу ҳақда Uzdiplomat.uz’га Адлия вазирлиги бўлим бошлиғи Санжар Норқувватов маълум қилди.
“Эндиликда Ўзбекистонда патент божи тўловчилари сифатида кўрсатилган резидент ва норезидент мос равишда жисмоний ва юридик шахс деб ўзгартирилиб, патент божи миқдорлари бирхиллаштирилди.
2023 йил ҳолатига кўра, мамлакатда 331 та ихтиро Адлия вазирлиги томонидан давлат рўйхатидан ўтказилди. Бу халқаро талабномаларни ҳам ўз ичига олади”, – деди у.
Унинг айтишича, эндиликда ихтиро ва фойдали моделларни давлат рўйхатидан ўтказишда II гуруҳ ногиронлиги бўлган шахсларга белгиланган патент божининг 90%,таълим олувчи шахсларга, илмий ва илмий-педагогик ходимларга 30 % миқдорида, юридик шахс бўлган кичик тадбиркорлик субектларига, давлат аккредитациясидан ўтган таълим ташкилотларига ва илмий ташкилотларга 25 % миқдорида имтиёзлар берилади.
«Патент божларини бирхиллаштирган пайтимизда ижтимоий химояга муҳтож қатлам бундан азият чекиб қолиши мумкин. Шу сабабли ҳам уларга имтиёзлар берилади. Давлат божларидаги ўзгаришлар эса муҳтож бўлган қатламга ўзининг кескин таъсирини ўтказмаслиги учун ҳам биз махсус тоифаларга имтиёз бермоқдамиз”, – деди Норқувватов.