«Мен Туркияда муҳожир бўлиб, оғир ишларда меҳнат қилаётган ўзбекларга ҳурмат билан салом айтмоқчиман. Бу ерда ўз тилларида гапирганда уларни ҳеч ким тушунмайди. Уларга ҳам бегоналардек муомала қилишади ва қаттиқ ҳақоратларга, камситишларга дучор бўлишади. Яъни Туркияда туркийлар учун ҳам тинчлик йўқ» – Буржуғул Чубук.
Жорий йилнинг 21 февраль – Жаҳон она тили кунида Туркия Буюк Миллат Мажлиси Бош Ассамблеясида «Жумҳурият халқ партияси» вакили Туркан Элчи курдча, Таҳсин Оcакли эса лазча нутқ сўзлади. Аммо ДЕМ партиясининг Измир депутати Буржуғул Чубук ҳам туркий тиллардан бири бўлган ўзбек тилида гапиргани учун цензурага учраган.
Чубук нутқини “Бизни экранларда кузатиб турган қадрли инсонларга ҳурматимни билдираман” деб бошлаган ҳам эдики, Жалол Аданнинг “ўчир” деган кўрсатмаси билан унинг микрофони ўчириб қўйилди.
Шундай бўлса-да Буржуғул Чубук минбарни тарк этмади ва микрофонни қайтадан ёқтириб, сўзини шундай давом эттирди:
“Ҳурматли мажлис аъзолари… Тушунмадингиз… Туркчани ҳам тушунмайсиз. Кейин она тилимиз туркча, туркча гапир, кўп гапир дейсиз. Шундай таълим тизими билан сиз турк тилидаги шеваларда гаплашувчи одамлар ҳатто бир-бирини тушунмайдиган ҳаётни ташкил қилдингиз. Сиз бундан фахрланасиз. Шу муносабат билан мен Туркияда муҳожир бўлиб, оғир ишларда меҳнат қилаётган ўзбекларга ҳурмат билан салом айтмоқчиман. Бу ерда ўз тилларида гапирганда уларни ҳеч ким тушунмайди. Уларга ҳам бегоналардек муомала қилишади ва қаттиқ ҳақоратларга, камситишларга дучор бўлишади. Яъни Туркияда туркийлар учун ҳам тинчлик йўқ” – деган у.
Шундан сўнг ДЕМ партияси аъзоси Чубук ижтимоий тармоқдаги саҳифасида ўша лаҳзалар акс этган видеони қуйидаги ёзув билан бўлишди:
“Жаҳон она тили кунида депутатларнинг ўз она тилида гапирган микрофонлари ўчирилди. МҲП раис ўринбосари худди тўнтарувчига ўхшаб “Туркча гапир” деб айтди. Биз ҳам ҳайрон бўлдик.
Биз гаплашадиган туркий тилни у ростдан ҳам тушунадими ўзи? Туркий тилларнинг шеваларидан бири бўлган ўзбекчани тушунмадилар, шунинг учун микрофонни ўчириб қўйишди”.