Uzdiplomat.uz Ўзбекистондаги ҳоким ўринбосарларининг пора олиш “мусобақасидаги иштирокчилар”ини аниқлади. Қайси ҳудудлар ҳокимликларида ўринбосарлар пора билан қўлга тушиши кўпроқ кузатилмоқда?
Вазият 2023-2024 йиллар кесимида таҳлил қилинган. Қашқадарё, Сирдарё, Наманган вилоятларида пора олган ҳоким ўринбосарлари икки нафардан. Тошкент, Андижон вилоятлари, Қорақалпоғистон республикасида биттадан пора олган ҳоким ўринбосарлари топилади.
- Қашқадарё вилояти Қарши тумани ҳокимлигининг қишлоқ хўжалиги бўлими бошлиғи ўринбосари фуқарога 25 гектар ерни номига расмийлаштириши эвазига 10 минг AҚШ доллари сўраб, 5 минг AҚШ долларини олаётганида ушланган.
Шунингдек, Қашқадарё вилояти Кўкдала тумани ҳокимининг ўринбосари маҳаллий деҳқонларга плёнка таъминотчиси бўлишини ваъда қилиб, эвазига 5 минг АҚШ доллари талаб қилган.
- Сирдарё вилоятида ҳам 2 нафар ҳоким ўринбосарининг пора олиши билан боғлиқ жиноят содир бўлган. Сайхунобод тумани ҳокими ўринбосари 25 минг доллар пора олишда айбланиб қўлга олинган. Ховос тумани ҳокими ўринбосари эса МЧЖга тегишли ерларни ҳокимлик захирасига олмаслиги учун 20 минг АҚШ доллари сўраган. Сўнгра 1 минг АҚШ доллари олган чоғида қўлга олинган эди.
- Наманган вилоятида ҳам бир ярим йил ичида 2 та ҳоким ўринбосари пора билан ушланган. Вилоятнинг Чортоқ тумани ҳокимининг қишлоқ ва сув хўжалиги масалалари бўйича ўринбосари ва Наманган вилояти ҳокимининг қурилиш, коммуникациялар ва коммунал хўжалик масалалари бўйича собиқ ўринбосари Саидаҳмад Султонов пора билан 7 йил 6 ойга қамалган.
- Андижон вилояти Избоскан тумани ҳокими ўринбосари 8 сотих ерни 5,3 млн эвазига олиб бермоқчи бўлган. Ҳуқуқни муҳофаза қилувчи органлар томонидан текширилганда ишнинг бошида туман ҳокимининг ўринбосари турганлиги аниқланган.
- Қорақалпоғистон Республикаси Тахиатош тумани ҳокимининг қурилиш, коммунал хўжалик, экология ва кўкаламзорлаштириш масалалари бўйича ўринбосари фуқарога ҳужжатларни ноқонуний расмийлаштириши эвазига 35 млн. сўм талаб қилган.
- Тошкент вилояти Бўка тумани Фавқулодда вазиятлар бўлими бошлиғи 2022 йилда қурилган кўп қаватли уй учун “Қурилиши тугалланган объектни фойдаланишга қабул қилинишига 2500 AҚШ доллари талаб қилган. Маълум бўлишича, ушбу ҳоким ўринбосари 12 минг АҚШ долларини хизмат машинасида олаётганида қамоққа олинган.
Вилоят ва ҳоким ўринбосарлари 2024 йилнинг дастлабки чорагига кўра, Ўзбекистон Республикаси Бизнес Омбудсманнинг қайд этишича, 5 нафар ҳоким ўринбосарлари тадбиркорлар билан боғлиқ жиноятларда айбдор деб топилиб жазога тортилган. Аммо ушбу ҳоким ўринбосарларининг қайси туман ва вилоят ҳокимлигидан эканлиги очиқланмаган.