Uzdiplomat.uz сўнгги йилларда энг узоқ ҳокимлик қилиб келаётганлар рўйхатини тузди. Рўйхатни “қўлларингдан бало ҳам келмайди”, деган ҳоким Шуҳрат Абдураҳмонов бошлаб бермоқда.
Ш.Абдураҳмонов 11 йилдан буён Андижон вилоятини бошқариб келади. Андижондаги 11 йиллик муаммо, камчилик ва ютуқлар унинг зиммасида. Хайрулла Бозоров узлуксиз 2 вилоятдаги бошқаруви билан 9 йил вилоят ҳокими мансабидан тушмай келмоқда.
Жиззах вилояти ҳокими Эргаш Салиев 7 йиллик бошқарув билан учинчи ўринда. Тез-тез мансабдорлар курсиси алмашадиган Ўзбекистонда бир лавозимни узоқ ушлаб туриш осон иш эмас, аммо буни уддалаётган ҳокимлар талайгина.
Ҳокимлик курсисида тезда оммага машҳур бўлган Сурхондарё ҳокими Улуғбек Қосимов аввал прокурор, терговчи сифатида фаолият юритган. Шу сабабли ҳам ҳокимликка келиши билан ўқитувчи можароси билан танилди.
- Абдураҳмонов Шуҳрат Кушақбаевич 2013 йилдан ҳозирга қадар — Андижон вилояти ҳокими, 11 йилдан буён ушбу лавозимда;
- Бозоров Хайрулла Ҳайитбаевич 2020 йилдан Фарғона вилояти ҳокими (2 та вилоят) умумий 9 йил узлуксиз мазкур курсини банд қилиб келмоқда. У Фарғонадан аввал 5 йил давомида Наманганда ҳокимлик қилган.
- Жиззах вилояти ҳокими Салиев Эргаш Алибекович. У 2017 яъни 7 йилдан буён ушбу мансабда;
- Турдимов Эркинжон Оқбутаевич Самарқанд вилояти ҳокими (2 та вилоят умумий 6 йил). У 2020 йил 8 октябрь кунидан буён Самарқандда ҳокимлик қилмоқда ундан аввал Турдимов Сурхондарёда 2 йил ҳокимлик қилган.
- Зоир Мирзаев 2021 йилдан ҳозиргача— Тошкент вилояти ҳокими вазифасида фаолият олиб бормоқда. (Кетма-кет 2 та вилоят умумий 6 йил) Тошкент вилоятига келгунча Зоир Мирзаев 3 йилга яқин Қашқадарё вилоятида ҳокимлик қилган. У бундан аввал ҳам 2010-2016 йилларда Самарқанд вилояти ҳокими сифатида ишлаган.
- Абдуразаков Шавкат Шокиржонович 2020 йилдан Наманган вилояти ҳокими курсисини банд қилган ва бунга 4 йил бўлди;
- Азимов Муротжон Бердиалиевич 2021 йил 18 ноябрдан Қашқадарё вилояти ҳокими; 3 йил.
- Бухоро вилояти ҳокими сифатида 2021 йил январдан Зарипов Ботир Комилович ишлаб келмоқда; 3 йил.
- Сирдарё вилоятига 2022 йилда Махмудалиев Акмалжон Азимжонович ҳоким этиб тайинланган; 2 йил.
- Навоий вилояти ҳокими бўлиб 2022 йилдан Турсунов Нормат Тулкунович ишлай бошлаган; 2 йил.
- Умурзаков Шавкат Буранович Тошкент шаҳар ҳокими лавозимига 2023 йил март ойида тайинланган; 1 йил.
- Қосимов Улуғбек Бердиқобилович Сурхондарё вилояти ҳокими сифатида 2023 йилдан бошлаб фаолият кўрсатмоқда. 1 йил.
- Раҳимов Жўрабек Раҳимович 2023 йил март ойида Хоразм вилояти ҳокими этиб тайинланган; 1 йил.
Ҳокимлар умргузаронлиги даврида турли хил “томошалар “ кўрсатган. Масалан, Шавкат Умурзаков Тошкент шаҳри ҳокими бўлганига кўп бўлмасдан пойтахтда шунча тизимли муаммолар турганда, дўконларда “рейд” ўтказгани акс этган видеолар ижтимоий тармоқларда тарқалган. Видеотасвирда ҳоким яшикдаги мевалар айниганини айтиб, тадбиркор ва атрофидаги ишчи гуруҳ вакилларига танбеҳ берган. Бу ҳолат жамоатчилик фаоллари ўртасида муҳокамаларга сабаб бўлган.
Сурхондарё ҳокими Улуғбек Қосимов эса мактаб директори билан тортишгани жиддий муҳокамаларга сабаб бўлган. Ўрнидан турғазиб, уни “мактабдаги муҳитни бузганлик”да, “вилоятни бутун дунёга шарманда қилганлик”да айблаган. Ҳокимга жавобан «милтиқ бўлса отиб ташланг», деган директор. Қосимовга ҳеч қандай чора кўрилмади. Аксинча, таълим вазири Ҳилола Умарова уни «Таълим ҳомийси» кўкрак нишони билан мукофотлади.
Тошкент вилояти раҳбари Зоир Мирзаев “ПР” чиқишлари кўплиги билан ажралиб туради. Энг камида ойига бир маротаба ижтимоий тармоқда нутқларидан парча видеолар айланиб туради.
Самарқанд вилояти ҳокими 2020 йил 8 октябрь куни Президент Шавкат Мирзиёев раҳбарлигида жамиятда аёллар ва ёшларнинг ролини ошириш ҳамда бандлигини таъминлаш масаласида видеоселекторда айтган гаплари билан бутун Марказий Осиёда машҳур бўлган эди.
Унда Эркинжон Турдимов “Бугунги кунда хорижда ҳам, ўзимизда ҳам уй ишларини қилувчи оқсочлик касбига талаб ортиб бормоқда. Самарқанд вилоятидан ҳам жуда кўпчилик аёллар чет давлатларда, хусусан Туркияда уй ишларини бажаришади. Ўзимизда ҳам аҳоли иқтисодий имкониятлари ошган сари бу касб эгаларига бўлган талаб ортаверади. Аммо бундай аёлларни тайёрлайдиган марказлар йўқ. Ана шундай марказларни очишни таклиф қиламан”, деган гапи билан машҳур бўлганди.
Қашқадарё вилояти ҳокими Мурод Азимов прокурор ва терговчи соҳаларида ишлаб келган.
Шуҳрат Абдураҳмонов вилоят ҳокимлари ичида энг узоқ ҳокимлик курсисини сақлаб қолаётганлардан ҳисобланади. Унинг жорий йилнинг август ойида «Дунё садолари» фестивалида «Менинг гапларимдан кавак қидирманглар. Овора бўлиб ёмонлик қидирмаларинг қўлларингдан бало ҳам келмайди барибир… Минг ўйлаганинг билан сочинг оқаради ёки тўкилади, холос. Бошқа нарса бўлмайди», деган гапи кенг муҳокамаларга сабаб бўлди. Худди шу гап-сўзлар босилмай туриб “маҳалла аёлларини маймунлар” деб камситган аудиоси тарқалди.