Бош прокуратура «Яшил макон» умуммиллий лойиҳаси доирасида 541 та ҳолатда амалда экилмаган 1 миллиондан зиёд кўчатлар ҳисоботларга қўшиб ёзилганини аниқлаган эди. Шунингдек, 441 та ҳолатда 580 минг туп кўчат суғориш тизими мавжуд бўлмаган жойларга экилгани айтилган эди. Аммо Тожикистон ҳукумати бундай катта рақамларга қарамай «Яшил макон» лойиҳасини ижобий деб ҳисоблаган. Тожикистон ҳукумати экологияни баҳолаш бўйича тажрибани Ўзбекистондан ўрганмоқчи.
7 август куни Тожикистон Республикаси ҳукумати ҳузуридаги Атроф-муҳитни муҳофаза қилиш қўмитаси делегацияси Ўзбекистон Давлат экологик экспертиза марказига ташриф буюрган.
Учрашувда экологик жараёнларда жамоатчилик иштирокини ошириш ва унинг фикрларини инобатга олган ҳолда Ўзбекистон тажрибаси тақдим этилган.
Ташрифда Тожикистон Атроф-муҳитни муҳофаза қилиш қўмитаси раиси Баҳодир Шерализоданинг қўшнилар тажрибасига қизиқаётгани айтилган.
Бундан ташқари, Тожикистон делегацияси Экология, атроф-муҳит ва иқлим ўзгариши вазирлигида бўлиб, «Яшил макон» лойиҳасига ижобий баҳо берган.
Албатта вазирлик ўтказган тақдимотида бу каби камчиликлар ҳақида одатдагидек оғиз очилмаган.
Музокаралар давомида томонлар экология соҳасида қўшма лойиҳаларни амалга оширишга келишиб олишган.
Ташриф якунлари бўйича ҳамкорликни янада ривожлантириш, тажриба алмашиш ва қўшма лойиҳаларни амалга ошириш бўйича келишувга эришилган.
Маълумот учун, республикада йилига 2 млн 200 минг тоннадан зиёд ифлослантирувчи моддалар чиқарилган бўлиб, Тошкент шаҳрида ҳаводаги ифлослантирувчи моддалар миқдори қарийб 420 минг тоннани ташкил этган.
Эслатиб ўтамиз, жорий йилнинг июль ҳолатига Тошкентда 87 та ноқонуний дарахт кесиш ҳолатлари аниқланиб, табиатга 817,3 миллион сўм зарар етказилгани айтилган эди