➖ЖСТга аъзо бўлиш билан нарх-наво арзонлашадими?
➖Аъзолик Ўзбекистон иқтисодиётини ўсишига туртки берадими?
Собиқ депутат Дониёр Ғаниев Ўзбекистон давлат монополларини кўпроқ ўйлаётгани учун Жаҳон Савдо Ташкилотига аъзо бўла олмаётганини айтмоқда. У Ўзбекистоннинг ЖСТга аъзолиги орқали қандай ўзгаришларга эришиш мумкинлиги ҳақида фикр билдирди.
“Vatandosh” интеллектуал клубининг дастлабки йиғилишида Ўзбекистоннинг Жаҳон Савдо Ташкилотига (ЖСТ) аъзолигининг мамлакат ҳаёти учун аҳамияти мавзусида мутахассислар билан учрашув ташкиллаштирилди. Учрашувда мамлакат ташкилотга аъзо бўлса Ўзбекистондаги айрим монополлар тугатиладими ёки уларнинг манфаатлари қандай ҳимоя қилинади, деган саволга Қонунчилик Палатаси депутати (3 август санасига кўра) Дониёр Ғаниев ўз мулоҳазаларини билдирди. У давлатдаги монополларни ҳеч ким унутиб қўймаслигини ва уларнинг ҳуқуқлари ҳимоя қилинишини айтди.
“Бизда аъзоликнинг чўзилиб кетишининг сабаби ҳам шу, музокараларда биз кўпроқ уларни ўйлаяпмиз. Ҳуқуқ ҳимоячиларимиз фикрини инобатга олиб, кўпроқ монопол ташкилотларни ҳимоя чораларини кучайтиришга ҳаракат қилаяпмиз”, – дейди Дониёр Ғаниев.
Унинг фикрича, Ўзбекистон ташкилотга аъзо бўлса, белгиланган муддатдан кейин ҳам монополия давом этиши мумкин.
Ғаниев шунингдек, мамлакатдаги нархлар ва бож тўловлари тез арзонлашмаслигини ҳам қайд этиб ўтди. Чунки ЖСТга аъзо бўлгандан кейин ҳам ҳимоя муддатлари бўлади. Божлар ва нархлар тезликда арзонлашгани билан ҳозиргидан кескин фарқ қилмаслиги мумкин.
“Мамлакат даражасида оладиган бўлсак нархлар тушишининг умумий фойдаси катта, лекин оддий истеъмолчи, йиллик даромади 2000-3000 АҚШ доллари бўлган истеъмолчи учун бу фойда миқдори 100 ёки 200 доллар бўлиши мумкин”, дейди у.
Дониёр Ғаниев Ўзбекистон ривожланиши ЖСТга аъзо бўлиши ортидан келмаслигини айтмоқда.
«ЖСТга аъзо бўлиш йўлида ўзимиз яратган тўсиқларни ўзимиз олиб, уларни четга суриб тўғри йўл очишга бўлган ҳаракатларимиз сабабли бойиб кетишимиз мумкин», дейди Ғаниев.