Ҳокимлик ва вазирлик иши ўқитувчининг бўйнидами?Самарқанд вилояти ҳокимлиги сувсиз қолаётган мактаб муаммосига кўз юмди
Ўқитувчининг вазифаси ҳокимликларга бориб мактаб учун бино ва сув таъминотини сўраб югуриб юришми ёки дарс беришми? Мактабгача ва мактаб таълими вазирлиги ўқитувчиларни тўлалигича дарсдан чалғитмайдиган тизим яратишни ваъда берган эди. Бугун ўқитувчилар мактабнинг моддий таъминотини истаб масуъллар эшиги олдида мулзам бўлмоқда. Ўз ишлаётган мактаби учун қўшимча бино ва сув таъминотини сўраб Самарқанд вилояти ҳокимлиги сайёр қабулига борган ўқитувчи муаммони ҳал қила олмаганини ёзмоқда.
Самарқанд вилояти ҳокими сайёр қабулига борган ўқитувчига ҳоким “опен бюджет” орқали муаммосини ҳал қилиши мумкинлигини айтган. Ўқитувчи мактаб учун қўшимча ўқув биноси ва мактаб сув билан таъминланишини сўраган. Муаммо эса ҳал бўлмаган, ҳоким олдида масалани ҳал қилишини айтган масъул кейин ўқитувчи илтимосларини жавобсиз қолдирган.
Ҳокимдан самарасиз жавобни олган ўқитувчига «Маърифат» газетасига мактуб йўллаган. Мактубда шундай дейилади:
Бугун вилоят ҳокими сайёр қабулига боргандим. Ўзимга эмас, мактабимиз учун қўшимча ўқув биноси ва ичимлик суви билан таъминлаш масалаларида амалий ёрдам сўраб мурожаат қилгандим.
Вилоят ҳокимига мана шундай иссиқ об-ҳавода, вақт ажратиб, оддий халқни дардини тинглагани учун барча Самарқандликлар номидан, оддий халқ номидан миннатдорчилик билдираман. Ва шу ўринда бир кичик эътирозим ҳам бор.
Албатта, мени мурожаатимни вилоят ҳокими ўзи тинглади ва мактаб учун қўшимча ўқув биноси қуриш масаласини «опен буджетга» киритиш орқали ҳал қилиш мумкинлигини айтди.
2-масалани эса бир ҳокимият ходимига юклади (бу ерда исм-фамилиясини ёзишни хоҳламадим). У киши вилоят ҳокими олдида менга ёрдам беришини айтганди. Кейин менга «Опа, четроққа чиқиб гаплашиб олайлик», деди ва «Самарқанд сув таъминоти» АЖ ходимини чақирди. Бу ташкилот ходими эса сув иншооти қуриб бериш унинг вазифасига кирмаслигини, қачонки вилоят ҳокимлиги ёки вилоят Халқ таълими бошқармаси томонидан пул ажратилсагина, сув иншооти қуриб бера олишини айтди. Бу масалани яна бирорта ҳомий ёрдами орқали ёки давлат дастурига киритиш орқали ҳал қилиш мумкинлигини айтиб, икковлон менга маслаҳат беришди.
Хуллас, мана шундай масъулиятсиз масъулларнинг бу мурожаатга панжа орасидан қараши натижасида масала йиллар давомида ўз ечимини топмай келмоқда. Бу кўзбўямачиликлар, қоғозбозликлар кимга керак? Қачон масалага жиддий ёндашиб, ечим топиб, амалий ёрдам беришни ўрганамиз? Қуруқ маслаҳат бериш осон, лекин биз ХХI аср — техника асрида яшаяпмиз. Болалар мактабга бир сумка китоб кўтариб келсинми ёки чанқаб қолмаслиги учун бир бакалашка сув олиб келсинми?», деб ёзади Нуробод туманидаги 15-мактаб бошланғич синф ўқитувчиси Севара АБДУРАСУЛОВА.