Кеча 3 июль куни Тошкентда динлараро ва дин ичидаги бағрикенглик тамойилларини тарғиб қилиш бўйича ҳисобот давра суҳбати бўлиб ўтди.
Ушбу давра суҳбати Америка Қўшма Штатлари Халқаро Тараққиёт Агентлиги (USAID) Ўзбекистон журналистларини қайта тайёрлаш маркази ва Search for Common Ground халқаро ташкилотлари ҳамкорлигида бўлиб ўтди.
Шунингдек, мазкур давра суҳбатида бир қанча блогерлар ҳамда журналистлар ҳам иштирок этиб, Ўзбекистондаги диний бағрикенглик бўйича ўз фикрлари билан бўлишди.
«Ўзбекистонда диний бағрикенглик ва динлараро мулоқот масалаларни ёритишда жуда ҳам муҳим қадамлар қўйиляпти. Айниқса, диндаги муаммолар, вазиятлар ҳақида гапириш жуда муҳим. Нозик масала ҳисобланган диний бағрикенгликнинг маълум бир стандартлари бўлиши турли эътиқод вакилларига ўзининг конституциявий эркинлик ва ҳуқуқларидан фойдаланиш ҳуқуқини беради.
Ўзбекистонда бизнинг ташкилотимиз томонидан анча йиллардан бери диний бағрикенглик хусусида қатор ишлар амалга оширилиб келинган. Шу ўринда айтишим керакки, Ўзбекистон бой маданий тарихга эга ўлка ҳисобланади. Шунинг учун бу ерда кўплаб динлар, турли эътиқодлар мавжуд. Ўзбекистонда давлат томонидан инсонларни эркин, хоҳлаган динига эътиқод қилиши ёки умуман ҳеч қандай динга эътиқод қилмаслик ҳуқуқларини амалиётга жорий этилишига шароит яратиб берилиши демократик ва очиқ социал жамиятнинг белгиси ҳисобланади.
Шу ўринда ОАВнинг эркинлиги ҳам давлатга, ҳам турли ижтимоий қатламга жуда катта фойда беради. Инсонлар ҳозир асосий маълумотларни ижтимоий тармоқлардан олишади. Бу дегани уларга янгиликлар керак. Диний бағрикенгликни ОАВ орқали тарқатиш, улар бу масалаларни ёритишда эркин ва холис бўлиши, объективликни сақлаши жуда ҳам муҳим. Авваламбор келажакда инсонлар ўзларининг конституцияда белгиланган дин эркинлиги хусусидаги ҳуқуқларини амалда қўллашга муҳим ҳисобланади»,
деди USAIDнинг Ўзбекистондаги миссияси директори вазифасини бажарувчиси Эдвард Михалски
Ўз ФА Археология институти тадқиқотчиси Эльдар Асанов эса Ўзбекистондаги диний бағрикенглик масаласига баҳони илмий тадқиқотларсиз бериш қийинлигини гапирди.
«Ўзбекистондаги диний бағрикенглик масаласига баҳони илмий тадқиқотларсиз бериш қийин. Ҳамма ўзининг тажрибасига қараб баҳо беради. Менда ҳам ушбу лойиҳа бошланишидан олдин бошқача эди, ҳозир бўлса фикрим ўзгарди. Кўпчилик экспертлар 1990 йилдан бошлаб Ўзбекистонда диний бағрикенглик камайган дейишади. Шу масалада интернет орқали келишмовчиликларни кўрганмиз»,
дейди у.
Асановнинг фикрича, тоқатсизлик асосан ижтимоий тармоқларда. Аслида эса халқимиз бағрикенг.
«Ушбу лойиҳа давомида турли соҳа экспертлари, турли қатламлар билан ишладик ва кўрдикки аслида интернетдан олган таассуротлар тўғри эмас экан. Яъни бағрикенгликнинг аҳамиятини тушунадиган одамлар кўп экан. Энг муҳими улар зиёли қатлам, ижтимоий фикр лидерлари, диний соҳа вакиллари бор. Уларнинг фикрлари яъни муносабатлари нима учун муҳим. Чунки уларга қулоқ соладиган одамлар, аудитория бор. Бағрикенгликни улар орқали тушунтириш мумкин. Шу сабабли мен ўйлайманки ушбу лойиҳа биз учун яхши тажриба бўлди. Мана шу биз ишлаган аудитория орқали кенгроқ оммага тарғиб қилишимиз ҳамда бағрикенглик масаласини янада яхшилашимиз мумкин»,
дейди у.
Маълумот учун, ушбу лойиҳа журналистларни қайта тайёрлаш маркази ва Search for Common Ground халқаро ташкилоти томонидан амалга оширилган лойиҳада олти ой давомида Наманган, Нукус, Бухоро, Тошкент, Урганч, Фарғона ва Андижон вилоятларидан 500 га яқин журналист, блогерлар, диний ташкилотлар, ННТ вакиллари ва фаоллар иштирок этган.