Америка Қўшма Штатлари Ўзбекистоннинг Жаҳон Савдо Ташкилотига аъзо бўлиш устуворлигини белгилаш бўйича қатъий мажбуриятини тўлиқ қўллаб-қувватлайди. Қўшма Штатлар Ўзбекистоннинг савдо режимини ЖСТ қоидалари ҳамда тамойилларига мослаштириш бўйича олиб борилаётган ички ислоҳотларга кўмак беришга ваъда берди. Бу ҳақда АҚШ Савдо вакили Кэтрин Тайнинг Ўзбекистонга ташрифи бўйича берган баёнотида маълум қилинган.
Баёнотга кўра, Қўшма Штатлар Ўзбекистоннинг жорий йилда ЖСТ бозорига кириш бўйича икки томонлама музокараларда эришилган ютуқларидан мамнун бўлганини ва бу музокаралар якунланиши икки мамлакат учун манфаатли бўлишини билдирган.
Тай АҚШнинг гўшт ва паррандачилик корхоналари ўз махсулотларини Ўзбекистонга экспорт қилаётганини алоҳида таъкидлаган.
“АҚШ савдо вакили Ўзбекистоннинг ЖСТга аъзо бўлиш жараёнини тезлаштириш мақсадида савдо билан боғлиқ интеллектуал мулк бўйича давом этаётган ютуқларини қайд этди. Ўзбекистон интеллектуал мулк ҳуқуқларини ҳимоя қилиш ва қўллаш соҳасидаги барқарор яхшиланиши туфайли махсус 301 кузатув рўйхатидан чиқарилган”,
дейилган баёнотда.
Бундан ташқари, Ўзбекистон интеллектуал мулк ҳуқуқлари масалалари, мамлакатда контрафакт товарларнинг кўпайиши кузатилаётганини ҳал қилиш бўйича яқин ҳамкорликни давом эттиришга тайёрлигини билдирган.
Шунингдек, АҚШ Ўзбекистоннинг бугунги кунгача миллий қонунчилик ва амалиётини ЖСТ келишувларига мувофиқлаштириш борасидаги саъй-ҳаракатларини ҳам эътироф этган.
“Америка Қўшма Штатлари ва Ўзбекистон аёлларнинг иқтисодий имкониятларини кенгайтириш ҳамда ногиронлар ҳуқуқларини таъминлаш бўйича ҳамкорликни давом эттириш мажбуриятини олди. Бунда савдо афзалликлари барча ишчиларга тааллуқли бўлишини ва таъминот занжири барқарорлигини таъминлаш муҳимлиги таъкидланди”,
дейилган Кэтрин Тай баёнотида.
Эслатиб ўтамиз, аввалроқ Буюк Британия ва Исроил ҳам Ўзбекистонни ЖСТга аъзо бўлишини қўллаб-қувватлаган эди.