Тошкент, Жиззах ва Наманганда прокурор, терговчи, суриштирувчи, адвокат ва бошқа мансабдорлар пора билан кўлга тушди. Бу ҳақида Давлат хавфсизлик хизмати маълум қилди.
Хабарга кўра, Жиззах вилояти прокуратурасининг бўлим прокурори Жиззах шаҳрида яшовчи муқаддам судланган фуқарони ўзининг ваколатли ҳамкасби орқали жазони олиб ташлашни ваъда қилиб, эвазига 1000 АҚШ доллари ва 1 дона “SAMSUNG GALAXY S24 ULTRA” русумли телефон аппаратини олган вақтида қўлга олинган.
Шунингдек, Тошкент шаҳар Яккасарой туман ИИО ФМБ ҳузуридаги Тергов бўлими терговчиси ва 2 нафар суриштирувчи ўзаро тил бириктириб, хизмат мавқейидан фойдаланган ҳолда, жиноят иши бўйича айбланувчига нисбатан “қамоққа олиш” тарзидаги эҳтиёт чорасини қўлламаслик ҳамда унинг ҳаракатларини Жиноят Кодекснинг нинг тегишли моддалари бандига қайта малакалаш эвазига, айбланувчининг таниши орқали 7 минг АҚШ доллари олган вақтларида ушланган.
Бундан ташқари, Тошкент шаҳрида яшовчи, муқаддам судланган 2 нафар шахс фуқаронинг ишончига кириб, унга нисбатан қўзғатилган жиноят ишини прокуратура органларидаги танишлари орқали ижобий ҳал қилиб бериш ва “қамоққа олиш”тарзидаги эҳтиёт чорасини қўлламаслик эвазига 50 минг АҚШ доллари талаб қилиб пулларни ундирмоқчи бўлганда қўлга олинган.
Яна шу каби, Наманган шаҳридаги адвокатлар ҳайъати адвокати вилоят ИИБ томонидан Наманган шаҳар судида кўриб чиқилаётган жиноят иши бўйича айбланувчига нисбатан суд органларидаги танишлари орқали озодликдан маҳрум қилиш билан боғлиқ бўлмаган жазо тайинланишига ёрдам бериш эвазига 10 минг АҚШ доллари талаб қилиб, 8 минг АҚШ доллари олган вақтида ашёвий далиллар билан ушланган.
“Ҳозирда мазкур шахсларнинг барчасига нисбатан Жиноят Кодексининг тегишли моддалари билан жиноят ишлари қўзғатилиб, қамоқ эҳтиёт чораси қўлланилган”,
дейилади хабарда.
Маълумот учун, жорий йилнинг-январь апрель ойларида Давлат хавфсизлик хизмати ходимлари томонидан 5,5 млрд пора олган амалдорлар ушланган.