Қозоғистон халқаро тараққиёт агентлиги КазАИД 10-12 июнь кунлари “Дўстлик – дипломатия” дастури доирасида Ўзбекистондан, шунингдек, Қозоғистон, Қирғизистон, Тожикистон ва Туркманистондан бўлган 14 нафар дипломатни ўқитади.
Бу ҳақда 10 июнь куни Қозоғистон Ташқи ишлар вазирлиги матбуот котиби Айбек Смадияров ўзининг ҳафталик брифингида дея маълум қилган.
“Малака ошириш ва тажриба алмашишга қаратилган тренинг Остона шаҳридаги Қозоғистон Президенти ҳузуридаги Давлат бошқаруви академиясида бўлиб ўтмоқда.
Дастурда барқарор ривожланиш, давлат органларининг ривожланишга расмий ёрдам кўрсатишдаги роли, Марказий Осиёда барқарор ривожланиш мақсадларини (БРМ) амалга оширишдаги ўзаро боғлиқлик, сув муаммолари ва минтақавий ҳамкорлик истиқболлари каби курслар мавжуд. Унда Оролни қутқариш халқаро жамғармаси (ИФАС) ва Иқтисодий тадқиқотлар институти вакиллари ўз билимлари билан ўртоқлашадилар”,
дейилган хабарда.
Қайд этилишича, дастур ўз мамлакатлари сиёсий ҳаётида иштирок этувчи ўрта ва юқори даражадаги дипломатлар учун мўлжалланган бўлиб, тренинг КазАИД гранти ҳисобидан бепул амалга оширилмоқда.