“Толибон” муваққат ҳукумати Америка қуролларини Хамасга жўнатаётгани учун энди минтақада қурол-яроғ савдосини чеклаш чоралари ишлаб чиқилиши мумкин. Бу ҳақда Euroasia Today нашри ёзмоқда.
Кеча, 9 июнь куни Ўзбекистон вакиллари Абдулазиз Комилов ва Исматилла Иргашев Афғонистон ҳақида гаплашиб олиш учун Вашингтонга борди. Уларни АҚШнинг Афғонистон бўйича вакили Томас Вест таклиф қилган. Бу ҳақда Вест ўзининг Twitter саҳифасида маълум қилган.
“Ўзбекистон президентининг ташқи сиёсат масалалари бўйича махсус вакили Абдулазиз Комилов ва Президентнинг Афғонистон бўйича махсус вакили Исматилла Иргашевни Афғонистондаги умумий манфаатлар ва истиқболдаги йўлларни муҳокама қилиш учун Вашингтонда қабул қилишдан мамнунман”,
дея ёзган у.
Суҳбат мазмуни ҳозирча номаълум, аммо турли манбалар АҚШ Афғонистон билан алоқа ўрнатишда Ўзбекистондан кўмак сўраган бўлиши мумкинлигини ёзмоқда.
“Афтидан, минтақада шунингдек, Марказий Осиё давлатлари ва Афғонистон ўртасидаги муносабатлар стратегияси муҳокама қилинади.
Бундан ташқари, ушбу стратегиялар Исроил билан можаро пайтида Фаластинни қўллаб-қувватловчи давлат билан ўзаро муносабатларни камайтиришга қаратилган бўлади.
Хулоса қилиб айтганда, АҚШ Афғонистонни Ғарбий Осиё (Яқин Шарқ) ва Марказий Осиё давлатлари билан ҳамкорликнинг мумкин бўлган шаклларидан ажратиб қўйиш сиёсатини давом эттирмоқда”,
дея ёзган Euroasia Today.