Россия ҳукумати Федерацияда ишлаётган Ўзбекистон фуқаролари учун муносиб меҳнат шароитларни яратиш ва мигрантларнинг ижтимоий ҳимояси учун барча имкониятларни ишга солади. Бу ҳақда Россия Президенти Владимир Путин икки давлат раҳбарлари учрашуви юзасидан бўлиб ўтган матбуот анжуманида айтиб ўтди.
Биз Ўзбекистон расмийлари билан миграциянинг долзарб масалалари бўйича ҳамкорлик ҳужжатлари устида ишлашни давом эттирамиз,
деган у.
Путиннинг сўзларига кўра, Россияда бир миллиондан ортиқ Ўзбекистон фуқаролари яшаб меҳнат қилмоқда.
Шавкат Мирзиёев доим бу масалага алоҳида эътибор қаратади. Биз уларнинг (Ўзбекистон фуқаролари) Россия иқтисодиёти, айниқса, қурилиш, уй-жой коммунал хўжалиги, транспорт ва логистика каби жадал ўсаётган тармоқларни ривожлантиришга қўшаётган салмоқли ҳиссасини юксак қадрлаймиз”,
деди Путин.
Шунингдек, у Россияда ишлаётган мигрантларнинг ўз ватанларига юбораётган пул ўтказмалари Ўзбекистон иқтисодиёти ва мигрантларнинг оилалари учун жиддий кўмак бўлаётганига алоҳида урғу берган.
Бундан ташқари, Путин Ўзбекистон Республикаси раҳбариятидан рус тили ва рус маданиятига бўлган самимий муносабати учун миннатдорлик билдирди.
Эслатиб ўтамиз, аввалроқ Россия Ташқи ишлар вазири ўринбосари Михаил Галузин Россия меҳнат бозори Марказий Осиёдан келган муҳожирлар учун муқобил эмаслигини айтган эди.