Ўзбекистоннинг Франциядаги элчиси Сардор Рустамбоев энди Ҳиндистонга элчилик қилади. Бу ҳақда 4 декабрь куни Олий Мажлис Сенати раиси Танзила Норбоева қарор имзолаган. https://senat.uz/oz/decisions/post-1590
“Сардор Мирзаюсупович Рустамбоев Ўзбекистон Республикасининг Ҳиндистон Республикасидаги Фавқулодда ва Мухтор Элчиси лавозимига тайинлансин. Ушбу Қарор қабул қилинган кундан эътиборан кучга киради”, деб ёзилган қарорда.
Эътиборлиси, Рустамбоев айни пайтда Ўзбекистоннинг Франциядаги Фавқулодда ва Мухтор элчиси ҳам ҳисобланади. У бу лавозимга 2018 йилнинг июнь ойида тайинланган ва ҳозиргача унинг лавозимдан бўшагани ҳақида ҳеч қаерда ахборот берилмади.
Шунингдек, унинг янги лавозимга ўтгани ҳақида ҳам расмий манбалар ҳозирча оғиз очгани йўқ.
Сардор Рустамбоев 1979 йилда туғилган. У Бирмингем университетини тамомлаган. Тошкент давлат шарқшунослик институти ва Лондон университетининг магистри, сиёсий фанлар номзоди.
2000 йилдан буён Ўзбекистон Ташқи ишлар вазирлиги тизимида турли лавозимларда ишлаган. 2017-2018 йилларда Ташқи ишлар вазирлигининг Шанхай ҳамкорлик ташкилоти билан ҳамкорлик бошқармасида бўлимни, 2018 йил май ойидан эса Глобал сиёсат ва хавфсизлик бошқармасида бошқармани бошқариб келади.