Россия Ташқи ишлар вазирлигининг МДҲ давлатлари учинчи департаменти директори ўринбосари Сергей Оверченко Россия ва Марказий Осиё давлатлари бугунги оғир синовлардан муносиб тарзда ўтаётганини айтди. Бу ҳақда у “Валдай” халқаро мунозара клубида бўлиб ўтган суҳбат чоғида сўз очган.
Биз Қозоғистон, Қирғизистон, Тожикистон, Туркманистон, Ўзбекистон билан тенг ҳуқуқлилик, ҳурмат ва ишонч асосида муносабатларни фаол ривожлантиришда давом этамиз. Шу билан бирга, биз иқтисодий шерикчилик ва ўзаро манфаатга йўналтирилган очиқ ҳамкорликни йўлга қўйдик”
деди Оверченко.
Унинг айтишича, ҳозирги шароитда Ғарб санкцияларига қарамай, Россия Федерацияси ва Марказий Осиё ўртасидаги савдо айланмаси ўсиб бормоқда.
Ғарбнинг ноқонуний санкцияларига қарамай, [Марказий Осиё мамлакатлари билан] ўзаро товар айирбошлаш ҳажмини ошириш мумкин. Минтақада Россия инвестициялари ҳам ортиб бормоқда, савдонинг таркибий базаси ресурс бўлмаган компонент туфайли кенгаймоқда”,
дея қўшимча қилган Оверченко.
Дипломат, шунингдек, Россия минтақа иқтисодиётида юқори улушга эга бўлган Марказий Осиё давлатларининг асосий савдо-иқтисодий шерикларидан бири ва минтақада ишлаб чиқариладиган маҳсулотларнинг асосий истеъмолчиларидан бири эканлигини ҳам таъкидлаб ўтган.
Эслатиб ўтамиз, аввалроқ Буюк Британия Ташқи ишлар вазири Лорд Кэмерон “санкцияларни четлаб ўтиш, инсон ҳуқуқлари ва ислоҳотлар бўйича мунозараларни илгари суриш” бўйича музокаралар олиб бориш учун Ўзбекистонга келганди.