Ўзбекистонда журналистларга яхши ҳақ тўланадими? Uzdiplomat.uz айни савол билан соҳа вакиллари орасида кичик сўровнома ўтказди.
Сўровнома жавоблари турлича. Журналистлар орасида KIA жип эгалари ҳамда 100 АҚШ долларидан кам маош олаётганлар ҳам бор.
Хусусан, “Yoshlar” телеканалида фаолият юритувчи Ҳамза Жумаев журналистлар яхши даромад тополмаётганини билдирди.
“Журналистларга кам ойлик тўланяпти. Мен 1 ой давомида ишлаб 800 минг ойлик олаётганларни ҳам эшитдим”,
дейди у.
Аммо, телебошловчи Муҳаббат Ҳамроева ўзининг яхши даромад топишини билдирди.
“Масалан, мен Киа Жип автомашиналарида юраман. Яхши ойлик оламан”,
дейди Ҳамроева.
«Migrant.uz» сайти мухбири Илёс Сафаров, журналистларга маош тўлаш улар ишлайдиган нашрга боғлиқлиги ҳақида гапирди.
“Буни гапиришдан олдин, журналистикадаги бозор муносабатлари қанчалик ривожланганлигига қараш керак. Таҳририятлар ва нашрларнинг даромад топиши фақат рекламага боғлиқ”,
дейди Сафаров.
Адлия вазири маслаҳатчиси, блогер Шаҳноза Соатованинг фикрича Ўзбекистонда журналистларнинг даромади кам.
“Ҳозир биласиз, давлат хизматчисиман, аммо шу соҳа бўйича фаолият юритаётган вақтимда журналистларга кам ойлик бериларди”,
дейди у.
“Milliy tv” бошловчиси Манижа Баҳриева, ким кўп иш қилса, яхши даромад топиши мумкинлигига ишонмоқда.
“Ким кўп ишласа, яхши ойлик олади, масалан, мен яхши ойлик оламан”,
дейди Баҳриева.
Жавобларга кўра, “шоумен”лар яъни ТВ телебошловчиларининг маоши юқори, муаммоларни ёритувчиларнинг аксари эса муаммода.