Ўзбекистон аҳолисининг қашшоқлик даражаси 2015 йилда 36 фоизни ташкил қилиб, 2022 йилда 17 фоизга қисқарган. Бу ҳақда Жаҳон Банки хабар берди.
Хабарда айтилишича, Ўзбекистоннинг қашшоқлик даражаси Европа ва Марказий Осиёнинг қолган қисмига қараганда тезроқ, яъни 13 фоиздан 8 фоизга тушган.
“Миллий фаровонлик стандарти янги, аммо 2021 йилда яратилганидан бери қашшоқлик 2023 йилда 17 фоиздан 11 фоизга камайди – қишлоқ жойларда (8 фоиз) шаҳарлардагига (4 фоиз) нисбатан каттароқ пасайиш кузатилди. Бу 1,6 миллионга яқин кишининг қашшоқликдан чиқиб кетганини англатади. Бу суръат билан ҳукумат 2021-2026 йиллар оралиғида қашшоқликни икки баравар камайтириш мақсадига эришмоқчи”,
дейилган Жаҳон Банки хабарида.
Шунингдек, хабарда қашшоқликни камайтиришнинг энг асосий омиллари сифатида қуйидагилар келтирилган:
- Уй хўжалик даромадларининг ўсиши;
- Иш ҳақининг ошиши;
- Ижтимоий нафақалар.
Бунда иш ҳақининг ошиши камбағалликни қисқартириш бўйича эришилган ютуқларнинг асосийсини, яъни 60 фоизини ташкил этган.
“Ҳукумат асосий дастурларни модернизация қилди ва кенгайтирди. Нафақаларни яхшилаш, уй хўжаликлари оладиган турли ижтимоий имтиёзлар ҳам камбағалликнинг қисқаришига катта ижобий таъсир кўрсатди”,
дейилган хабарда.
Маълумот учун, Ўзбекистонда камбағаллик чегараси 648 минг сўм этиб белгиланган. Uzdiplomat.uz сайти аввалроқ мазкур миқдор билан бир одам бир ой яшаши мумкин, ё йўқлиги ҳақида сўровнома ўтказган эди.