Ўзбекистонда эндиликда бир шахс сурункали икки марта Сенат Раиси бўла олмайди. Бу ҳақда “Ҳуқуқий ахборот” Телеграм канали хабар берди.
Унга кўра, Президент томонидан имзоланган қонун билан айрим ҳужжатларга ўзгартириш киритилган.
“Ўзбекистон Республикаси Олий Мажлисининг Сенати тўғрисида”ги Конституциявий Қонунига киритилган қўшимчага кўра, айни бир шахс сурункасига икки муддатдан ортиқ Сенат Раиси бўлиши мумкин эмаслиги белгиланди” – дейилган хабарда.
Ҳозирги вақтда Ўзбекистон Олий Мажлис Сенати Раиси вазифасини Танзила Норбоева бажариб келмоқда. У бу лавозимга дастлаб 2019 йилда, кейин эса 2020 йилнинг 20 январида қайта тайинлаган.
Бундан келиб чиқадики, у сурункасига икки марта Сенат Раиси бўлишга улгурган. Хўш, Танзила Норбоева ортиқ Сенатга раислик қилолмайдими?
Uzdiplomat.uz мазкур саволга жавоб олиш учун Адлия вазирлигига юзланди. Жамоатчилик билан алоқалар бўлими бошлиғи Севара Ўринбоева “бу саволга жавобни фақат Сенат вакиллари бериши мумкинлигини” айтиб ўтар экан, ўз тахминларини ҳам қўшимча қилди.
“Агар қонун кучга кирадиган бўлса, Танзила Норбоеванинг ваколат муддати ноллаштирилиши мумкин”, – деди у.
Эслатиб ўтамиз, бу йил Ўзбекистонда навбатдаги парламент сайловлари бўлиши керак. Янги чақириқдаги парламент 2025-30 йиллар давомида фаолият юритади.