3 март куни 74 нафар ҳамюртимиз АҚШдан Ўзбекистонга қайтарилган. Маълумотларга кўра, уларнинг кўпчилиги Мексика ва бир қанча бошқа давлатлар орқали Америкага ўтишган.
Маълумот учун, 2023 йилнинг 20 декабрида ҳам АҚШга ноқонуний йўллар билан кетган 119 нафар Ўзбекистон фуқаролари Ватанга қайтарилган.
Эслатиб ўтамиз, аввалроқ АҚШнинг Ўзбекистондаги элчихонаси АҚШ-Мексика чегараси орқали АҚШга киришга уринаётган Ўзбекистон фуқароларини чиқариб юбориш сиёсати бўйича шошилинч ўзгартиришлар киритилаётганини маълум қилган.
«АҚШ Қўшма Штатларда қолиш учун қонуний асосга эга бўлмаган Ўзбекистон фуқароларини мамлакатдан чиқариб юбориш масаласи бўйича Ўзбекистон ҳукумати билан яқиндан ҳамкорлик қилмоқда. Мамлакатдан чиқариб юбориш тижорат авиакомпаниялари ҳамда АҚШ Иммиграция ва божхона назорати билан тузилган чартер рейслари орқали амалга оширилмоқда», — дея хабар берган эди элчихона.
Шунингдек, элчихона АҚШ-Мексика чегараси орқали АҚШга ноқонуний миграция хавфли ва қиммат эканлигини қайд этиб, контрабандачиларнинг ёлғон ваъдаларига учмасликка чақирган.
АҚШ чегарасини ноқонуний кесиб ўтган шахслар ушбу мамлакатга камида беш йил ичида қонуний равишда қайта киришлари тақиқланади. Ноқонуний миграцияга ёрдам берадиган оила аъзолари ҳам виза олишдан бутунлай маҳрум этилиши мумкин.