uzdiplomat.uz маълумотни аниқлаштирди
Ветеринария қўмитаси вакили Қонунчилик Палатаси қонунни нотўғри талқин қилган, демоқда.
Бугун Олий Мажлис Қонунчилик палатасининг навбатдаги мажлисида ҳайвонларни идентификация қилиш, рўйхатга олиш ва кузатиш назарда тутилган қонун лойиҳаси кўриб чиқилди. Депутатлар томонидан “Ҳайвонларни идентификация қилиш, рўйхатга олиш ва кузатиш тўғрисида”ги қонун лойиҳаси биринчи ўқишда қабул қилинган.
Унда чорва ҳайвонларини идентификация қилиш бўйича ягона давлат сиёсатини юритиш, ҳайвонларда юқумли касалликларнинг олди олиш ҳамда мамлакатда озиқ-овқат маҳсулотлари хавфсизлигини таъминлаш масалалари назарда тутилган.
Шунингдек, ҳайвонлар ҳисобини юритиш, ҳайвонларнинг насли билан боғлиқ ва уларнинг соғлиги тўғрисидаги ягона электрон тизим яратилиши белгиланмоқда. Ҳайвонларни идентификация қилувчи, рўйхатга олувчи ва кузатувчи мутахассисларининг, идентификация рақамини сақловчи атрибут ишлаб чиқарувчи ва ҳайвон эгаларининг ҳуқуқ ва мажбуриятлари белгилаб бериляпти.
Қонун ташаббускорлари томонидан ҳайвонларни идентификация қилиш тизимининг энг асосий афзаллик томонларидан бири сифатида бу тизим орқали озиқ-овқат хавфсизлиги таъминланиши иддао қилинган. Шу сабабдан истеъмол учун ишлатиладиган гўшт ва бошқа маҳсулотлар олинадиган қорамол, қўй ва эчки, чўчқа, от, эшак, туя каби ҳайвон турлари ҳамда улар учун касаллик хавфини туғдириши мумкин бўлган ҳамда касаллик кириб келишининг олдини олиш, эпизотик осойишталикни таъминлаш мақсадида, ит, мушуклар идентификация қилиниши таклиф этилмоқда.
Бу маълумот сабабли ОАВларда эшак гўшти энди истеъмол қилинадими деган савол ўртага ташланди. Uzdiplomat.uz мухбири вазиятга ойдинлик киритиш мақсадида Ветеринария ва чорвачиликни ривожлантириш қўмитаси ахборот хизмати раҳбари Анвар Суюновга боғланди. Унинг таъкидлашича, мушук ҳам, эшак ҳам идентификация қилинади.
«Идентификация қилиш дегани ҳайвонларга идентификация рақамини бериш дегани. Мисол учун мол ва қўйни қулоғига тақилади. Баъзи ҳайвонларга идентификация чиплари суюқлик орқали томирига урилади.
Ўша жойда ахборотни тайёрлаган ва тарқатган мутахассис қонунни нотўғри тушунган. Масала моҳиятини тўғри тушунмаган. Истеъмол қилинадиган ҳайвонлар билан идентификация қилинадиган ҳайвонларни нотўғри тушунган ва қўшиб юборган», дейди у.
Йиғин давомида айтилган маълумотга кўра, Ўзбекистонда ҳайвонларни идентификация қилиш бўйича Жаҳон банкидан 33 млн доллар маблағ ажратилган. 2024-2025 йилларда 25 та туманда, 2027 йил 1 январгача барча ҳудудда чорва ҳайвонлари тўлиқ идентификация қилинади.
Қонун лойиҳасида истеъмол учун ишлатиладиган гўшт ва бошқа маҳсулотлар олинадиган ҳайвонлар қаторига эшакнинг ҳам қўшилиши ЖСТ талабларига боғлиқ бўлиши мумкин. Чунки жаҳон бозорида эшак гўшти истеъмолдаги гўшт ҳисобланади ҳамда ундан турли озиқ-овқат маҳсулотлари тайёрланади.