Россиялик мутахассислар Ўзбекистон тарих дарсликлардаги йилларни хато қилиб чоп қилинаётгани ҳақида гапиришмоқда. Улар Ўзбекистон давлатчилигини Совет Россияси туфайли пайдо бўлганлигини унутмаслик кераклигини ва Ўзбекистон дарсликлари ўқувчиларни русофобларга айлантиришга уринаётгани ҳақида ёзишмоқда.
“Asia Today” нашри Ҳалқ таълим вазирлиги томонидан чоп қилишга рухсат берилган, 2020 йилда иккинчи бор нашр қилинган 5-синф тарих дарслигини мисол қилиб, у ерда йиллар билан боғлиқ хатолар ҳақида материал чоп қилди.
«Дарсликнинг биринчи нашри 2015 йилда чоп қилинган. Ўзбекистон ўқувчиларнинг камида 8 авлоди бузиб кўрсатилган фактлар асосида таълим олишмоқда», дейди муаллиф.
Бунга нисбатан Тошкентда истиқомат қилаётган ёзувчи ва журналист Владимир Фетисов эса доктор Геблеснинг «Ёлғон қанчалик даҳшатли бўлса, унга ишониш осонроқ бўлади» сўзини иқтибос сифатида фойдаланиб, ана шундай ёлғонларнинг бири Ўзбекистондаги ўзбек мактабларида ўқувчилар ўрганаётган тарих дарслиги эканлигини ёзган.
“Маълум бўлишича, Пётр I Ўрта Осиёнинг табиий бойликларини ҳам тортиб олишни режалаштирган. Савол туғилади: биз қандай бойлик ҳақида гапиряпмиз – уран, нефть, фойдали қазилмалар? Ўрта Осиё хонликлари ўша даврда қандай бойликларга эга эдилар? Буюк Пётр Ҳиндистонга сув йўли топиш ва Хива билан савдо-сотиқ бўйича музокаралар олиб бориш мақсадида Бекович-Черкасскийнинг кичик отрядини юборди. 200 кишилик отряд (фақат хавфсизлик учун) Хива ва Бухоро ҳукмдорлари қўшинлари учун хавф туғдира олмас эди. Турар жой қулайлиги баҳонасида Хива хони томонидан отряд бўлиниб, йўқ қилинган, Бековичнинг боши Бухоро амирига совға сифатида юборилган, терисидан ноғора ясаган. Кампаниянинг омон қолган иштирокчилари қулликка сотилди. Лекин дарслик муаллифлари, албатта, бу ҳақда ёзмаганлар”- дейилган мақолада.
Ёзувчи, журналист дарсликнинг атиги 3 саҳифасида ҳақиқатга тўғри келмайдиган фактларнинг рўйхатини тузиб чиққан.
Мақолада Ўзбекистондаги чет давлатлари билан ҳамкорликда ишлаб чиқилган дарсликлар ҳақиқатга тўғри келмайдиган фактлар болаларни фақат Россияга қарши фикрларга уйғотиши ва уларда миллатлараро низоларни шакллантириши мумкинлиги ёзилган.
“Бу дарслик Россияга нисбатан нафратдан бошқа ҳеч нарса келтира олмайди.”, – дейилади “Asia Today” нашрида.
Шунингдек, журналист Ўзбекистон давлат сифатида фақат Совет Россияси туфайли пайдо бўлганини унутмаслигимиз кераклигини иддао қилмоқда.
Журналистнинг таъкидлашича, Ўзбекистон ва Россия муносабатлари илиқ ва дўстона кетаётган вақтда бундай ёлғон дарсликлардан фойдаланиб тарихни ўргатиш ғалати.
“…Олий таълим соҳасида Россия ва Ўзбекистон ўртасида ўзаро алоқалар анча йўлга қўйилган, аммо улар ақли нозик ва мустаҳкамланмаган мактаб ўқувчиларни эса русофобларга айлантиришга уринмоқдалар”, – деган хулоса берилади хабарда.
Эслатиб ўтамиз, Uzdiplomat олдинроқ Ўзбекистон тарихи бўйича видеоматериал эълон қилган эди.