Эндиликда вазирлик маблағ сарфини изоҳлаш учун ҳуқуқий асос изламоқда
Қишлоқ хўжалиги вазирлиги БМТ томонидан “Ўзбекистоннинг қурғоқчиликка учраган экотизимларини яйловлар ва ўрмонларини барқарор бошқариш” лойиҳасини амалга ошириш учун ажратилган пуллардан қимматбаҳо автомобиль сотиб олган. «Ревизор» каналида ёзилишича, Қишлоқ хўжалиги вазирлиги айнан хорижий валюта ҳисобидан автомобиль учун маблағ ажратган. Мазкур иш юзасидан Uzdiplomat вазирликдан изоҳ сўраганда, вазирлик матбуот котиби иш ҳуқуқий тарафлама ўрганилаётганини маълум қилди. Шунингдек матбуот котиби сайтимизга жавоб бермаслигини ва барча учун умумий жавоб эълон қилинишини маълум қилди.
БМТ Озиқ-овқат ва қишлоқ хўжалиги ташкилоти ҳамда Глобал экологик жамғарма иштирокидаги “Ўзбекистонни қурғоқчиликка учраган экотизимларида яйловлар ва ўрмонларни барқарор бошқариш» лойиҳаси учун 5 йил муддатга 3 млрд 776 минг 941 АҚШ доллари ажратилган.
Лойиҳани амалга ошириш, ижрочи ва техник ёрдам кўрсатувчи этиб Экология, атроф-муҳитни муҳофаза қилиш ва иқлим ўзгариши ҳамда Қишлоқ хўжалиги вазирлиги белгиланган эди. Маблағлар айнан Бухоро ва Навоий вилоятидаги қурғоқчиликка қарши курашиш учун ажратилган.
Жорий йилнинг 31июль кунида Қишлоқ хўжалиги вазирлигининг хорижий валютада юритиладиган ҳисоб рақамига БМТ Озиқ-овқат ва қишлоқ хўжалиги ташкилоти томонидан 199,889 доллар ўтказиб берилган.
Вазирлик ушбу пулдан 600 млн сўмлик “KIA Carnaval Prestige» автомобилини харид қилган.
Uzdiplomat мазкур иш юзасидан Қишлоқ хўжалиги вазири матбуот котиби билан боғланганида ушбу воқеа юзасидан ҳуқуқий баҳо бериш учун ишлар олиб борилаётганини маълум қилган. Вазирликда маблағлар аввал сарфланиб кейин унга ҳуқуқий баҳо изланмоқда. Шунингдек, вазирлик матбуот котиби Uzdiplomaʼtга алоҳида жавоб бермаслигини, иш якунига етганида эса барчага бирдек муносабат беришини айтди.
Маълумот учун, 5-6 сентябрь кунлари БМТнинг Озиқ-овқат ва қишлоқ хўжалиги ташкилоти (ФАО) бош директори Цюй Дунъюй Ўзбекистонга амалий ташриф билан келиши кутилмоқда. Цюй Дунъюй Тошкентда ўтадиган «Денгизга чиқиш имкони бўлмаган ривожланаётган давлатлар озиқ-овқат хавфсизлиги ва барқарор ривожланиш мақсадлари» халқаро форумида иштирок этади.