Мактабгача ва мактаб таълими вазирлиги раҳбарияти иштирокида ўтказилган матбуот анжуманида журналистлар томонидан шу масала ҳам кўтарилди.
Ота -оналар томонидан мажбурий форма жорий этилиши юзасидан эътирозлар бўлмоқда. Улар ўрганиб чиқиладими? 2024-2025 ўқув йилидан республика мактаб ўқувчиларида бир хил форма бўлиши белгиланган эди. Бу ижро этиладими?
Мактабгача ва мактаб таълими ўринбосари Фарҳод Боқиевнинг таъкидлашича, ҳар бир мактаб томонидан ўз низоми бўйича белгиланган форма танлаб олинади. Ҳозирга қадар ўқувчилар бир хил форма кийсин, деган қаттиқ талаб қўйилмаган. Демак, бу йили ҳам мактабларда мажбурий форма жорий этилмайди.
- Энди биринчи масала ота-оналарни мажбурият тариқасида деган фикрига мен қўшилмайман. Чунки вазирликда бу борада арзномалар ва эътирозлар тушгани йўқ. Ва умумий мазмунда ота-оналарнинг ўзлари ҳам хоҳлаяптики, ўша мактабда кийимлар бир хилда бўлишини. Ҳудудларда бўлаётган йиғилишларни мазмунини ҳам йиғяпмиз. Бизда ҳаммаси ўзимизда бор. Иккинчиси, 2024-2025 йил ўқув йилидан формани мажбурий қилиш масаласи, яъни Вазирлар маҳкамасини қарори бор эди. Кейин унга тегишли ўзгартишлар киритилган. Унда шундай банд бор: Босқичма-босқич жорий этилади деган. Яқинда ҳар бир ҳудудда одоб-ахлоқ қоидаларида белгилаб қўйилган бизнинг тавсиямиздан келиб чиқиб мактаблар ўзини ҳудудида, ўзини таълим ташкилотида қандай форма бўлишини ўзи белгилайди, -деди вазир ўринбосари Фарҳод Боқиев.
Мактабгача ва мактаб таълими вазирлиги томонидан олиб борилган ўрганишлар ва таҳлил натижаларига кўра, ягона мактаб формаси мактаб ўқувчилари (уларнинг ота-оналари) ўртасида кийиниш бўйича рақобатни чеклайди, турли хил ижтимоий-иқтисодий тоифадаги оилалар фарзандлари орасида табақаланишнинг визуал фарқини кескин камайтиради.
«Бугунги кунда мактаб формаси билан боғлиқ масалалар кўп муҳокама қилинмоқда. Биламизки, ўқувчиларнинг мактаб формаси ва уни кийишга бўлган ягона талаблар Вазирлар Маҳкамасининг қарори билан тартибга солинган.
Шунингдек, вазирликнинг 2023 йил 31 августдаги 282-сонли буйруғи билан ўқувчиларини кийиниш маданияти бўйича ўз тавсияларини барча мактабларга етказган ва шу асосида улар томонидан ички тартиб-интизом қоидалари ишлаб чиқилган», дея жавоб берди вазир Ҳилола Умарова.
Вазир қайд этган «Умумий ўрта таълим муассасасининг такомиллаштирилган намунавий одоб-ахлоқ қоидалари»га мувофиқ, ўқувчиларнинг таълим муассасаси уставида ман этилган либос ва қиёфада, жумладан ўғил болалар калта шим, футболка, шиппакда ва қизлар тор ва танани очиқ кўрсатувчи юпқа, ҳарир кийимларда келиши ҳамда бўйни ва бармоқларига турли тақинчоқлар тақиши ман этилади.
Эслатиб ўтамиз, 2018 йилда ҳукумат томонидан ягона мактаб формалари намуналари тасдиқланганди. 2018/2019 ўқув йилидан бошлаб ўқувчилар уни ихтиёрий тартибда кийишга ҳақли экани белгиланди. Мактаб формалари мажбурий бўладиган сана 2019/2020 ўқув йилидан 2024/2025 ўқув йилига – 5 йилга кечиктирилди. Вазирлар Маҳкамасининг 2018 йил 15 августдаги 666-сон қарорига тегишли тузатишлар киритилди. Унда ягона мактаб формаси 2025 йилга қадар босқичма-босқич жорий этилиши белгилаб қўйилган.