АҚШ нашрлари яна Россияни президентлик сайловолди ташвиқотларига аралашувда айбламоқда. Америкалик Саймс ва Риттер, Россия телеканалларида ишлаётган шахслар, Россияга қарши санкцияларни айланиб ўтишда гумон қилинмоқда.
АҚШда Aдлия вазирлиги кенг кўламли жиноий терговни бошлаган, бу ҳақида The new York Times ёзмоқда. Газета манбаларининг айтишича, бу «Кремлнинг AҚШда ноябр ойида бўлиб ўтадиган президентлик сайловлари арафасида таъсир кўрсатиш операцияларига» жавобдир. Расмийларнинг сўзларига кўра, Кремлнинг тарғибот аппарати Трампнинг номзодини қўллаб-қувватлайди ва Демократлар партиясидан номзод Камала Ҳаррисни бадном қилишга қаратилган ёлғон хабарлар тарқатиш билан шуғулланадиган бутун агентликлар фаолият юритмоқда.
Aвгуст ойида ФҚБ агентлари Россия давлат оммавий ахборот воситалари билан боғлиқ бўлган икки машҳур шахс – БМТнинг собиқ қурол инспектори ва ҳозирги AҚШ ташқи сиёсатининг танқидчиси Скотт Риттер ва 2016 йилда Трампнинг биринчи президентлик кампаниясида маслаҳатчи бўлган Дмитрий Саймснинг уйларида тинтув ўтказди. Тергов Саймс ва Риттернинг Украинага босқинига жавобан Россияга қарши жорий этилган иқтисодий санкцияларни ва чет-эл агентлари тўғрисидаги қонунни бузиши мумкинлиги билан боғлиқ, деб ёзади The New York Times (NYT) Aмерика ҳукумати манбаларига таяниб.
Russia Today учун мустақил муаллиф сифатида ишлаган Риттер, NYT нашрига берган интервьюсида, Нью-Йорк штатининг Делмар шаҳридаги уйида ўтказилган тинтувни сиёсий қарашларини билдиргани учун қўрқитишга уриниш деб атади. ФҚБ агентлари ва штат полицияси унинг мобил телефон, компьютер ва хотира дискларни олиб қўйишган.
2018 йилдан бери Биринчи каналда ҳафталик «Катта ўйин» ток-шоусини олиб бораётган Саймс Россия давлат оммавий ахборот воситаларига ўзининг биргина ҳисобидан ташқари барча банк ҳисоблари музлатилганини ва агентлар унинг совет авангард санъати коллекциясини олиб қўйганини айтиб арз қилган.