Корея Республикаси Президенти Юн Сок Ёль 10-15 июнь кунлари давлат ташрифи билан Туркманистон, Қозоғистон ва Ўзбекистонда бўлади. Бу ҳақда журналистларга Жанубий Корея етакчиси маъмурияти ходими Ким Тхэ Хё маълум қилди.
Унинг айтишича, у Марказий Осиёдаги ташрифдан сўнг Украинага боради.
“Марказий Осиё қадимий Ипак йўлининг асосий қисми бўлган, Европа ва Осиёни боғловчи стратегик маскан.
Украина ва Яқин Шарқдаги вазият каби кўплаб инқирозлар фонида минтақанинг аҳамияти ортиб бормоқда»,
дейди Миллий хавфсизлик бюроси директорининг биринчи ўринбосари Ким Тхэ Хё.
Унинг сўзларига кўра, Президентга рафиқаси ҳамроҳлик қилади. Май ойида Украина Президенти Владимир Зеленский Юн Сок Ёлни Швейцарияда 15-16 июнь кунлари бўлиб ўтадиган халқаро конференцияда иштирок этишга таклиф қилган эди. 3 июнь куни Корея Республикаси Ташқи ишлар вазирлиги таклифнома ҳали ҳам кўриб чиқилаётганини маълум қилганди.
Маълумот учун, охирги марта Жанубий Корея Президенти Мун Чжэ Ин Ўзбекистон Республикаси Президенти Шавкат Мирзиёевнинг таклифига биноан 2019 йил 18 апрель куни давлат ташрифи билан Ўзбекистонга келган. Ўшанда ҳам у 16-18 апрель кунлари Туркманистонга, 21-23 апрель кунлари Қозоғистонга ташриф буюрган.
Ўзбекистон Президенти Шавкат Мирзиёев эса охирги марта 2017 йил ноябрида Жанубий Кореяга сафар уюштирган.