Ўзбекистон Республикаси Соғлиқни сақлаш вазирлиги ходимларидан иборат делегация аъзолари Туркия Республикасининг Истанбул шаҳрида бўлиб ўтган “Йирик бўғимлар эндопротезлашнинг долзарб муаммолари” мавзуидаги халқаро анжуман ва маҳорат дарсларида иштирок этди.
Ушбу анжуман илк маротаба ташкил этилган бўлиб, унда хорижий мамлакатлардан 103 нафар етакчи мутахассис қатнашган.
“Анжуманда чаноқ-сон бўғимини эндопротезлашнинг долзарб муаммолари юзасидан маъруза билан иштирок этдим. Чаноқ-cон бўғими эндопротезлаш амалиётларида учрайдиган мураккаб ҳолатлар ва уларнинг ечимлари бўйича билдирган таклифларим хорижлик мутахассисларда қизиқиш уйғотди. Сессия сўнгида бу бўйича қизғин мунозаралар қилинди”, – дейди Республика ихтисослаштирилган травматология ва ортопедия илмий-амалий тиббиёт маркази директори, профессор Муроджон Ирисметов.
Қайд этилишича, ўзбекистонлик травматолог-ортопедлари соҳада дунёнинг етакчи мамлакатлари тажрибалари билан мунтазам танишиб бормоқда. Ўз навбатида, Ўзбекистонда замонавий жарроҳлик усулларининг барчаси амалга оширилади.