Ўзбекистон мамлакат мудофааси соҳасида Чехия Республикаси билан ҳамкорлик қилиши мумкин. Бу ҳақда Чехиянинг Ўзбекистондаги элчихонаси маълум қилди.
Унга кўра, 15 февраль куни Тошкентда Чехия элчихонаси ва Ўзбекистон Республикаси Мудофаа вазирлиги ҳузуридаги мудофаа саноати агентлиги, шунингдек, “UzTechTrade” давлат корхонаси ўртасида Чехия ва Ўзбекистон мудофаа соҳасидаги ҳамкорлик масалалари муҳокама қилинган.
“Чехия етказиб берувчиларни диверсификация қилиш саъй-ҳаракатларини қўллаб-қувватлаш учун Мудофаа кучларини замонавий техника ва технологиялар билан таъминлаши мумкин”, – дейилган элчихона хабарида.
Эслатиб ўтамиз, аввалроқ Ўзбекистон ва Қозоғистон Франциянинг Dassault Aviation аэрокосмик ҳарбий компаниясидан Rafale қирувчи самолётини сотиб олиш бўйича музокаралар олиб бораётгани ҳақида хабар қилган эдик. Аммо кўп ўтмай, Қозоғистон бу харбий техникани сотиб олмасликка қарор қилганини айтиб чиққан эди. Ўзбекистон Мудофа вазирлиги ахборот хизмати Uzdiplomat’нинг қирувчи самолёт бўйича саволига “Изоҳсиз” дея жавоб қайтарганди.