Европа бўйлаб Россиянинг эҳтимолий тажовузига қарши ҳарбий амалиётлар ўтказилган.
Шимолий Aтлантика альянсининг логистика қўмондонлиги раҳбари генерал-лейтенант Aлександр Золлфранк Daily Mail’га берган интервьюсида, агар НАТО ва Россия ўртасида уруш бўладиган бўлса, катта эҳтимол билан «кенг жанг майдонида» содир бўлишини ва жиддий йўқотишларга олиб келишини айтган. Шу сабабли, эвакуация режалари, жумладан, ярадорларни жанг майдонидан кенг кўламда эвакуация қилиш учун режа тайёрланмоқда.
Генералнинг таъкидлашича, Россиянинг Ҳарбий-космик кучларининг кенг имкониятлари туфайли ярадорларни ҳаво орқали эвакуация қилиш жуда хавфли бўлиши мумкин, шунинг учун санитария поездларидан фойдаланиш яхшироқдир. Золлфранк, шунингдек, ярадорларни даволаш учун зарур бўлган кучли дори-дармонлар, жумладан оғриқ қолдирувчи воситаларнинг эркин ҳаракатини таъминлайдиган «ҳарбий-тиббий Шенген»ни яратишни чораларидан бири сифатида тилга олган.
Daily Mail таъкидлаганидек, тиббий эвакуация режалаштириш НAТОнинг Россия билан бўлиши мумкин бўлган урушга тайёргарлик кўришнинг фақат бир элементи. Масалан, 22 январдан 31 майгача НAТОнинг Steadfast Defender 2024 деб номланган 1988 йилдан буён энг катта ҳарбий машғулотлари ўтказилди. Уларда 90 мингдан ортиқ ҳарбий хизматчилар, 50 дан ортиқ кемалар, жумладан, авиаташувчилар ва эсминецлар, 80 дан ортиқ самолётлар, вертолётлар ва дронлар, шунингдек, 1,1 мингдан ортиқ жанговар техникалар, жумладан 133 та танк ва 533 BMP қатнашди. Бу машғулотлар Россиянинг эҳтимолий тажовузига тайёргарлик кўришнинг бир қисми бўлиб, бутун Европа бўйлаб, жумладан, Буюк Британия, Германия, Венгрия, Греция, Полша, Швеция ва бошқа давлатларни қамраб олган.