Қашқадарё вилояти Кўкдала инспекторлари ходимлари 12 август куни солиқчилар кунини тонги соат 3:00 гача “Мовороуннаҳр” ресторанидан нишонлаб қочиб қолишган. Бир ҳафтадан кейин пулини сўраб борган ресторан эгаси Анвар Янгибоев ресторанни ёпишга киришишиб, эгасини 6 суткага қаматган.
“12 август куни солиқчилар куни экан. Ўша куни тумандаги солиқчиларнинг тўрт-беш нафари келиб, кечки пайт банкет қилмоқчи эканини айтишди. Жой қилиб беринг дейишди. Ўзлари билан олиб келинган бир яшик ароқ ва газли ичимликларни ташлаб кетишди ва кечки пайт соат 7 ларда йиғила бошлашди. Ўша куни тонгги 03:00 гача ўтирган солиқчилар жуда тартибсиз ўтиришди, кўп идишлар синдирилди. Ҳаммаси маза қилиб ўтиришиб, ҳисоб-китоб қилмай кетишди. Ҳатто раҳмат ҳам айтишмади. Уч кундан кейин ҳудудимизга масъул бўлган Озод исмли инспекторга телефон қилиб, ўша куни яхши ўтдими, камчилик бўлмадими, болалар яхши хизмат қилдими, деб сўрадим. Изига ҳисоб-китоб бўлмаганини айтдим. Раҳбарининг аввалдан меҳмонлари бўлганини, қарзи борлигини эслатдим-да, “уни сўрамаяпман, лекин буни ҳисоб қилиб кетмасаларингиз бўлмайди. Мен бутун туманнинг харажатини кўтара олмайман”, дедим. Озод ҳисоб-китоб қиламиз ака, ёпилади деди. Лекин келмади”, – деган тадбикор.
Унинг айтишича, мулоқотдан сўнг, ресторанга 3 нафар солиқчи келиб, ўша кунги еб-ичар ҳисобини кўришган. Қанча қарздорлик бўлганини билиб қайтишган. Бироқ ҳисоб-китоб қилинмаган.
Янгибоевга кўра, кейинги куни Озод исмли инспекторга телефон қилиб солиқчилар келганини, аммо ҳисоб-китоб қилмаганини айтишган.
“Эртаси куни соат 2 ларда 2 миллион 900 минг сўм пул олиб келяпти. Ўзи жами ҳисоб-китоб ўзлари ароғи ва газли ичимликларини олиб келишгани боис, 3 миллион 400 минг сўмдан сал ошганди. 2 миллион 900 минг сўмни олиб, бу банкет учунми ёки эски қарзларми, дедим. Банкет учун олинг буни, эски қарзларни бошлиқнинг ўзи билан гаплашасиз деди. Хўп деб, пулни олиб қолдим ва ичкарига кирдим. Озод солиқчи кетди. Орадан ярим соат ҳам ўтмади, хонамда ўтиргандим ходимларим солиқчилар келишди, деди. Чиқсам, 2 киши турибди. Бу солиқчиларни илгари танимас эканман, фақат банкетда кўрган эканман. Улар рестораннинг 35 миллион сўм атрофида солиқ қарздорлиги борлигини, ёпмоқчилигини айтишди. Мен бунга жавобан бу товуқ катагимас ёки буткамас, устахонамас ёпишдан олдин огоҳлантириш бериш керакмасми дедим. Бу ресторанда айни пайтда ярим тайёр бўлган, пишган, айниб қолиши мумкин бўлган таомлар бор, дедим. Шунда ходим бу ҳақда туман Солиқ инспекцияси бошлиғининг 8 август куни имзолаган қарори борлигини айтди. Кўрсат десам, мана телефонда деди. Менга ҳужжатнинг ўзини олиб кел, дедим. Қолаверса, ҳужжатингни кўрсатмадинг дея атайлаб қилинаётган иш учун жаҳлим чиқа бошлади”, деган тадбиркор.
Ресторан эгаси агар фаолияти ноқоқнуний бўлса, 8 август куни ёпилиши лозим бўлган бўлса, нега 12 август куни келиб банкет қилдинглар ёпмадинглар деб сўраган. Аммо жавоб олаолмаган.
Тадбиркорнинг маълум қилишича, бу қарздорлик юзага келган 35 миллион сўмлик қарздорлик солиғи бўлиб, бу миқдор ҳар кварталда ошиб броган.
“Бу сумма ичида чек бермагансиз, дея жарима ҳам қўйишган экан. Лекин бу ҳақда бизга ҳеч ким айтмаганди, хабар бермаганди. Ўша куни дабдурстдан шунақа деб қолишди ва 35 миллион сўм ичида 8 миллион сўмлик жарима ҳам бор деб, шуни айтишди. Мен буларнинг барчаси ўша кунги банкет пулини сўраганим учун бўляптими дедим. Ва қонуний тартибда келишлари кераклигини айтиб, улардан ресторандан чиқиб кетишни талаб қилдим. Ўзим ҳам чиқаришга уриндим. Шунда солиқ ходимининг устидаги кўйлаги тугмаси узилган экан”, деган Анвар Янгибоев.
Шу вақтда тадбиркор 1000 қисқа рақамига қўнғироқ қилиб, солиқчиларнинг хатти-ҳаракатидан норозилигини айтиб, шикоят қилган. Воқеа жойига эса, Самад исмли туман солиқ инспекцияси бошлиғи етиб келагн.
“Солиқ инспекцияси бошлиғига нотўғри иш қилишаётганини айтиб, номарднинг иши бўляпти бу дедим. Бошлиқ ходими менга телефонда кўрсатган қарорининг қоғоз вариантини олиб келган экан. Бошлиқ билан кўп гаплашмадик, ҳокимнинг сайёр қабули бор деб кетди. Икки нафар ходимига кўринглар деб кетганди, лекин ходимлар ҳам бошлиқ кетгач, кетишди. “Участкавой” ҳам воқеани эшитганидан сўнг, ҳеч қандай ҳужжат қилмай, ортига қайтиб кетди. Лекин бир ҳафтадан кейин яна келиб, мендан тушунтириш хати сўради, устимдан солиқчилар арз қилишганини айтди. Бор воқеани ёзиб бердим. 5 сентябр куни эса қўнғироқ қилиб, эртаси куни суд бўлишини, судга боришим кераклигини айтди,-деган тадбиркор.
Анвар Янгибоевнинг қўшимча қилишича, 2024 йилнинг 6 сентябр куни мазкур ишни кўриб чиққан Кўкдала туман суди тадбиркорнинг солиқчиларга қилган хатти-ҳаракатини қоралаб, унга 6 сутка маъмурий қамоқ жазосини тайинлаган.
Қашқадарё вилоят Давлат солиқ бошқармаси ахборот хизмати мазкур ҳолат бошқарма бошлиғи томонидан назоратига олингани бўйича расмий муносабат берди.
“Ушбу ҳолат Қашқадарё вилояти солиқ бошқармаси бошлиғи томонидан назоратга олинганлигини, хабарда келтирилган маълумотлар ўрганилаётганлигини маълум қиламиз” – дейилади Қашқадарё вилоят Давлат солиқ бошқармаси муносабатида.