Қозоғистон Бош вазири ўринбосари Серик Жумангарнинг «Bloomberg» агентлигига берган интервьюсида Украинага қарши урушда Ғарб санкцияларига учраган Россиянинг Марказий Осиё давлатларига келтирган зарари ҳақида тўхталиб ўтган.
Унинг сўзларига кўра, Россияга қарши санкциялар Қозоғистонга катта зарар етказган. Биргина «Eurasian Resources Group» кон компанияси 40% зарар кўрган. Бу ташкилот Россияга руданинг айрим турларини етказиб бериш билан шуғулланган.
Ўзбекистон Россияга қўйилган Ғарб санкциялари сабабли қандай зарар кўрган?
Uzdiplomat мухбири бу савол билан Инвестициялар, саноат ва савдо вазирлиги, Иқтисодиёт ва молия вазирлиги ҳамда Савдо-саноат палатаси билан боғланиб кўрди.
Савдо-саноат палатаси матбуот котиби бу савол бу ташкилотга берилиши керак эмаслигини айтди.
Иқтисодиёт ва молия вазирлиги ҳам бу саволга уларга эмас Инвестициялар, саноат ва савдо вазирлигига берилиши кераклигини маълум қилган.
Инвестициялар, саноат ва савдо вазирлиги билан боғланганимизда эса улар яна Иқтисодиёт ва молия вазирлигига боғланишни сўради ва кейинроқ, вазирликка ўз саволларини ёзиб хат жўнатиши кераклигини айтди.
Шу тариқа саволларимиз очиқ қолди. Ўзбекистон иқтисодига жиддий таъсир қилганини эса иқтисодчилар айтиб келишмоқда.
Аввалроқ, Япония Россияга қарши санкцияларни четлаб ўтаётган Хитой, Ҳиндистон, БАА ва Ўзбекистонга санкция пакетларини кўриб чиқаётгани хабар қилинганди.
Бундан ташқари, АҚШ ва Европанинг 13-санкция пакетида Ўзбекистоннинг “Alfa Beta Creativ”, “GFK Logistics Aisa” ва “Mivizion” МЧЖлар Россияга қўшилиб АҚШ ва Европа санкцияларига учраган.
Эслатиб ўтамиз, 2023 йил декабрда Европа Иттифоқи 12-санкция пакетига асли ўзбекистонлик, «Микротех» АК асосчиси ва раҳбари Андрей Хохлунни киритган. 11-санкция пакетида эса Ўзбекистон корхоналари Alfa Beta Creativ” ва “GFK Logistics Aisa” киритилганди. АҚШ ҳам уларга нисбатан экспорт чекловларини жорий қилганди. АҚШ Савдо вазирлиги маълумотларига кўра, улар Россия ҳарбий ва мудофаа саноати эҳтиёжлари учун Америка товарларини сотиб олишда санкцияларни четлаб ўтишга ҳаракат қилган.