Италия ҳам Марказий Осиё ташқи ишлар вазирлари билан учрашади. Аввалроқ Британия ташқи ишлар вазири Девид Кэмэрон ҳамда Россия ташқи ишлар вазири ўринбосари Михаил Галузин ҳам Ўзбекистонга келган эди.
2024 йилнинг 29 май куни Италия ташқи ишлар ва халқаро ҳамкорлик вазири Антонио Тажани Римда Марказий Осиёнинг бешта давлати – Қозоғистон, Ўзбекистон, Тожикистон, Қирғизистон ва Туркманистон ташқи ишлар вазирлари билан учрашади. Бу ҳақда Nova News агентлиги хабар берди.
“Расмий Рим глобал сиёсий ва иқтисодий мувозанатлар марказида бўлган минтақага тобора кўпроқ эътибор қаратаётганини тасдиқлади”
дея ёзган Nova News
Манбага кўра, учрашувда Туркманистон ташқи ишлар вазири Рашид Мередов, Қозоғистон ташқи ишлар вазири Мурат Нуртлеу, Ўзбекистон ташқи ишлар вазири Бахтиёр Саидов, Тожикистон ташқи ишлар вазири Сироджиддин Мухриддин ва Қирғизистонлик ташқи ишлар вазири Жеенбек Кулубаев иштирок этади.
Йиғилиш ялпи мажлис ва учта ишчи сессияни ўз ичига олади. Иштирокчи давлатлар охирги марта 2021 йил декабрь ойида Ўзбекистон пойтахти Тошкентда учрашган.
Италия ва Марказий Осиё мамлакатлари ўртасидаги муносабатлар изчил ривожланиб бораётгани Марказий Осиё давлатлари раҳбарларининг Римга яқинда амалга оширилган ташрифлари чоғида эришилган келишувларда ҳам ўз ифодасини топмоқда
дейилади хабарда.