2023 йил августдан буён Президентнинг махсус топшириқлар бўйича маслаҳатчиси лавозимига тайинланган Сардор Умрзоқов оммавий ахборот воситаларида ва селектор йиғилишларида камнамо бўлиб қолган. Сўнгги вақтда Умрзоқов ўзининг хорижий ҳамкорларининг ижтимоий тармоқлардаги саҳифаларида кўринмоқда.
Жонатан Чарлз Сардор Умрзоқов Президент Администрациясида ишлаётганини кўргандан мамнунлигини изҳор этиб, linkedin тармоғида пост қолдирди. Жонатан Чарлз Европа тикланиш ва тараққиёт банкида (ЕТТБ), ташқи алоқалар бўйича директор (2011-2015йиллар) бўлган. У 2023 йилдан ҳозирги вақтгача ЕТТБ битирувчилари Ассоциацияси фахрий офиси аъзоси ҳамда ODI Europe директорлар кенгаши аъзоси ҳисобланади. Жонатан Сардор Умрзоқов ҳақида қисқача шундай ёзади: “Ўзбекистон Президенти Администрациясида Сардор Умрзоқовни Сума Чакрабарти билан бирга кўриш жуда ёқимли бўлди. У мамлакатдаги ислоҳотларни тарғиб қилишда давом этмоқда. Ташрифимиз давомида Тошкент шаҳрида халқаро тижорат судини ташкил этиш, хорижий инвесторлар учун кампания бошлаш ва Жаҳон савдо ташкилотига аъзо бўлишга яқинлашиш борасида ютуқларга эришдик».
Сума Чакраборти Президентнинг иқтисодий ривожланиш, самарали бошқарув ва халқаро ҳамкорлик масалалари бўйича маслаҳатчиси ҳисобланади. 2023 йилнинг декабрь ойида у ҳам linkedin саҳифасида Умрзоқов билан тушган суратини жойлаб, изоҳ қолдирган эди.
Сардор Умрзоқов Президент Администрацияси раҳбарлигидан янги лавозимга кўчирилгач, унинг Администрациядан кетгани ҳақида тасдиқланмаган маълумотлар тарқалган эди.