МТРКга яна давлатдан миллиардлаб маблағ ажратилмоқда.
ЎзМТРКни ривожлантириш жамғармаси ташкил этилади.
Телерадиокомпания фаолиятини такомиллаштириш учун янги фармон қабул қилинди. Аммо бу фармон оммага очиқлангани йўқ.
(Фармон нусхаси uzdiplomat.uz’да мавжуд.)
«Ўзбекистон Миллий телерадиокомпаниясининг мамлакатимиз медиамаконидаги ўрнини янада ошириш ҳамда фаолиятига замонавий ёндашувларни жорий этиш тўғрисида»ги фармонда тизимга яна маблағ ажратилиши назарда тутилаётганини кўриш мумкин.
➖Телерадиоканаллар ҳузурида радио, телевидение ва журналистика соҳаларидаги кадрлар тайёрловчи олий таълим ташкилотларининг кафедралари ташкил этилади.
Ҳужжатда Миллий телерадиокомпаниянинг мулклари сотилиши ҳам назарда тутилган.
Ўзбекистон Миллий телерадиокомпаниясининг марказий телерадиоканаллари реклама-тижорат фаолиятидан тушадиган маблағларнинг 50 фоизи;
- Ўзбекистон Миллий телерадиокомпаниясига тегишли давлат мулки объектларини сотишдан тушган маблағларнинг тўлиқ миқдори;
- бўш турган маблағларни тижорат банклари депозитига жойлаштиришдан олинган даромадлар;
- хомийлик хайриялари, хорижий (халқаро) ташкилотлар грантлари ва қонунчилик ҳужжатлари билан тақиқланмаган бошқа манбалар ҳисобига янги ЎзМТРКни ривожлантириш жамғармаси ташкил этилади.
Ўзбекистон Миллий телерадиокомпанияси ва тизим ташкилотларининг моддий-техника базасини мустаҳкамлаш, замонавий ва юқори сифатли технологик ускуналар билан жиҳозлаш ҳам назарда тутилган.
Ўзбекистон Миллий телерадиокомпанияси, тегишли ташкилот, корхона, хўжалик бирлашмалари, компаниялар ва банкларнинг улар томонидан телерадиоканалларга ихтиёрийлик асосида доимий равишда хомийлик ёрдами кўрсатиб бориш учун “Дўстлар клуби» фаолиятини йўлга қўйиш маъқулланган бўлиб бу ҳамкорлик йўлга қўйилишига Вазирлар Маҳкамаси кўмаклашади.
Шунингдек, ҳужжатда Ўзбекистон Миллий телерадиокомпанияси ва унинг тизимидаги телерадиоканаллар бино ва иншоотларида қурилиш-монтаж ишларини амалга ошириш бўйича 2025-2030 йилларга мўлжалланган манзилли дастур тасдиқланган. Иқтисодиёт ва молия вазирлиги ушбу манзилли дастур доирасида 2025 йилдан бошлаб зарур маблағларни ажратади.
Фармонни бажариш Бош вазир А.Арипов зиммасига юклатилган.
Ўтган йили чиққан Президент қарорига кўра МТРКга ажратилган €22,5 млн миқдордаги кредит давлат бюджети ҳисобидан қопланиши белгиланганди.
Ҳужжатда 2016 йил Тикланиш ва тараққиёт жамғармаси (мамлакат суверен жамғармаси) томонидан МТРКга ажратилган кредит бўйича тўловларни кечиктириш учун ҳисобланган пенялар ҳисобдан чиқарилган.
Эслатиб ўтамиз, 2024 йил учун МТРКга давлат бюджетидан 559,9 млрд сўм, 2023 йилда 555,94 млрд сўм маблағ ажратилган. 2022 йилда компанияга 463,6 миллиард сўм, 2021 йилда 427,1 миллиард сўм, 2020 йилда 399,5 миллиард сўм бюджет маблағлари ажратилган.