Бахтиёр Саидов бошчилигидаги делегация Афғонистоннинг Кобул шаҳрига ташриф буюрди. Бу ҳақда Ташқи ишлар вазирлиги хабар бермоқда.
Жорий йилнинг 12 март куни Ўзбекистон Ташқи ишлар вазири Бахтиёр Саидов бошчилигидаги делегация Афғонистон Ислом Амирлиги Бош вазири Мулла Муҳаммад Ҳасан Охунд билан учрашди.
Афғонистоннинг “Арг” газетаси хабарида Бахтиёр Саидов Ўзбекистоннинг Афғонистон билан иқтисодий ва қишлоқ хўжалиги тажрибасини баҳам кўришдан манфаатдор эканлигини билдирган ва Тошкент цемент заводи барпо этишга сармоя киритмоқчи эканини айтган.
Шунингдек, газета хабарида Афғонистонда кўмирдан 200 мегаватт электр қуввати ишлаб чиқариш ҳақидаги лойиҳа ҳам айтиб ўтилган.
Баёнотга кўра, мулла Муҳаммад Ҳасан Охунд Ўзбекистон томонини ушбу лойиҳаларни амалга оширишда ҳамкорлик қилишга ишонтирди.
“Ўзбекистон ва Афғонистон биродар мамлакатлардир. Ҳар икки мамлакатни диний, маданий ва тарихий муштараклик боғлаб туради. Афғонистонда юз бериб ўтган даврнинг турли қийинчиликларига қарамай, Ўзбекистон Афғонистон билан яхши муносабатда бўлиб, доимо ёрдам қўлини чўзиб келди. Биз бундан миннатдормиз ва келгусида ҳам ушбу муносабатлар янада мустаҳкамланишига умид қиламиз”, – деган Афғонистон Бош вазири Мулла Ҳасан Охунд.
Афғон манбаларига кўра, Бахтиёр Саидов “Афғонистон Ислом Амирлиги” ҳукуматининг Раис ўринбосари Мулла Абдуғали Бародар билан Қўштепа каналидан фойдаланиш масалаларини муҳокама қилишган. Музокаралар давомида Ўзбекистон Афғонистонга сармоя киритишга тайёр эканлиги, айниқса, Трансафғон коридорини қуриш масалалари атрофлича муҳокама қилинган.
Делегация таркибида Ўзбекистон Сув хўжалиги вазири Шавкат Ҳамроев ҳам бўлиб, у Қўштепа канали юзасидан “Толибон” вакиллари билан музокаралар олиб борган.