Ҳиндистонда Марказий Осиё Ташқи ишлар вазирлари учрашуви техник сабаблар туфайли маълум муддатга қолдирилди. Бу ҳақида Ташқи ишлар вазирлиги uzdiplomatʼга маълум қилди.
«Ҳиндистон тарафи кутилмаган техник сабаблар туфайли мазкур тадбирни кейинги муддатларга қолдиришни таклиф қилди ва Марказий Осиё мамлакатлари бу таклифни қабул қилди», — деди Ташқи ишлар вазирлиги матбуот котиби Аҳрор Бурҳонов.
Эслатиб ўтамиз, Ҳиндистондаги Марказий Осиё Ташқи ишлар вазирлари учрашуви жорий йилнинг 28-29 август кунлари бўлиб ўтиши режалаштирилган эди. Учрашувда, Евроосиёда терроризмга қарши курашнинг самарали механизмлари ва инклюзив алоқа йўлаклари муҳокама қилиниши керак эди.
Аввалроқ, Япония Бош вазири Фумио Кисиданинг Марказий Осиё давлатлари ва Мўғулистонга режалаштирилган ташрифи ҳам қолдирилган эди. Ўшанда мамлакатда содир бўлган зилзила ташрифнинг бекор қилинишига сабаб сифатида кўрсатилган.