Ўзбекистоннинг Корея Республикасидаги Фавқулодда ва Мухтор элчиси этиб Алишер Абдусаломов тайинланди.
У Сеулга тайинланишидан аввал Ўзбекистон Олий Мажлиси Сенати Раиси Котибиятига раҳбарлик қилган. Дипломат ҳозирда 40 ёшда. Тошкентдаги Халқаро Вестминстер университети ва Жанубий Кореянинг Кёнг-Хи университетини битирган.
Алишер Абдусаломов касбий фаолиятини Ўзбекистон Инвестициялар ва ташқи савдо вазирлигида (ҳозирги Инвестициялар, саноат ва савдо вазирлиги) бошлаб, етакчи мутахассисликдан Бош бошқарма бошлиғигача бўлган лавозимларда ишлаган ўтган. Унинг фаолиятида дипломатик хизмат ҳам муҳим ўрин тутади. Хусусан, у 2013-2016 йилларда Ўзбекистоннинг Япониядаги элчихонасида савдо-иқтисодий масалалар бўйича маслаҳатчи, 2018-2024 йилларда эса Жанубий Кореяда ҳам ушбу лавозимда ишлаган.
Янги элчи ўзаро ҳамкорликнинг иқтисодий, маданий ва дипломатик жиҳатларига эътибор қаратган ҳолда Ўзбекистон ва Жанубий Корея ўртасидаги икки томонлама ғмуносабатларни янада мустаҳкамлаш борасидаги ишларни давом эттириш ниятида.
Маълумот учун, 1995 йилдан 2024 йилгача Ўзбекистоннинг Сеулдаги элчихонасига Виталий Фен раҳбарлик қилган.
Эслатиб ўтамиз, жорий йилнинг 27 август кунида Исроилнинг Ўзбекистондаги элчиси Гидеон Лустиг тайинлангани ҳақида маълум қилгандик.