Абдушукур Хамзаев «Яшил макон» умуммиллий лойиҳаси доирасида экилган дарахтлар нобуд бўлаётганлигини танқид қилди.
Мамлакат миқёсида «Яшил макон» умуммиллий лойиҳаси доирасида экилган дарахтларни сақлаб қолиш бўйича етарлича чоралар кўрилмаяпти, дарахтлар кесилишига муддатсиз мораторий эълон қилинишига қарамасдан дарахт кесиш ҳолатлари тўхтамаяпти.
27 октябрь куни парламент сайловлари бўлиб ўтади, унда 5 та сиёсий партия депутатлик ўринлари учун рақобатлашади. Бугунги кунда сиёсий партиялар раҳбарлари ўз партияларининг ўтган сайловлардаги мақсадлари ва вазифаларининг бажарилиши, шунингдек, навбатдаги сайловларда қандай ташаббус ва мақсадлар билан қатнашиш ниятлари ҳақида ОАВга маълумот берди. Хусусан, Ўзбекистондаги сиёсий партиялар орасида энг ёш бўлган Экологик партия раҳбари Абдушукур Хамзаев оммавий ахборот воситаларига берган интервьюсида бир қатор долзарб масалалар ҳақида фикр билдирди.
Партия раҳбарининг таъкидлашича мамлакат миқёсида «Яшил макон» умуммиллий лойиҳаси доирасида экилган дарахтларни сақлаб қолиш бўйича етарлича чоралар кўрилмаяпти, дарахтлар кесилишига муддатсиз мораторий эълон қилинишига қарамасдан дарахт кесиш ҳолатлари тўхтамаяпти.
Шу билан бирга эндиликда мораторийни четлаб ўтиб, дарахтларни бошқа жойга «кўчириб ўтказиш» деган важ билан уларни шикастлантириш ва қуритиш ҳоллари давом этмоқда.
“Суғориш тизими мавжуд бўлмаган, ҳудудларнинг иқлим ва тупроқ шароитини ҳисобга олмасдан дарахтларни кўчириб ўтказиш, янгиларини экиш агротехникасига риоя қилмаслик оқибатида дарахтлар қуриши ҳолатлари юзага келмоқда.
Масалан, «Тошкент–Самарқанд–Бухоро» йўналишининг Сирдарё вилоятидан ўтувчи М39 автойўл билан темир йўл ҳимоя зонасигача бўлган оралиқда экилган жами 3 530 туп кўчатлар қуриган.” – Абдушукур Хамзаев.
Таъкидланишича ҳокимликларнинг эътиборсизлиги натижасида дарахтларнинг танасидан илдиз қисмига ўтишдаги ерларни бетон ва асфальт билан қоплаш, уларга турли электр чироқ ва реклама мосламаларини илиб қўйиш дарахтларнинг жиддий шикастланишига сабаб бўлмоқда. Афсуски бу борада Экология вазирлигининг ҳам қатъиятлилиги сезилмаётганлигига алоҳида эътибор қаратилди.